ރާއްޖެ އަންނަ ޓޫރިސްޓުންގެ އަދަދު އިތުރު ކުރުމާ ގުޅޭގޮތުން، ނެޝަނަލް ހޮޓެލްސް އެންޑް ގެސްޓްހައުސް އެސޯސިއޭޝަނުން ޓޫރިޒަމް މިނިސްޓްރީއާއެކު މަޝްވަރާކޮށްފިއެވެ. މި ބައްދަލުވުމުގައި ޓޫރިޒަމް މިނިސްޓަރު މުހައްމަދު އަމީން ބައިވެރިވެވަޑައިގެންނެވިއެވެ.
މި ބައްދަލުވުމުގައި ޓޫރިސްޓުން އިތުރު ކުރުމަށް ކުރެވޭނެ ކަންކަމާއި، އޭވިއޭޝަން ކަނެކްޓިވިޓީ އިތުރު ކުރުމާ ގުޅޭގޮތުން މަޝްވަރާކުރިއެވެ. އަދި އިންޓަނޭޝަނަލް ރޯޑް ޝޯތަކުގައި ރާއްޖޭގެ ބައިވެރިވުން އިތުރު ކުރުމަށް ވެސް މަޝްވަރާކުރިއެވެ. އެސޯސިއޭޝަނުން ބުނި ގޮތުގައި، ޓޫރިޒަމް މިނިސްޓްރީއާއި އެ ދާއިރާގެ ފަރާތްތައް ގުޅިގެން މަސައްކަތް ކުރުމަކީ މުހިންމު ކަމެކެވެ.
ރާއްޖޭގެ ޓޫރިޒަމް ކުރިއެރުވުމަށް އެސޯސިއޭޝަނުން ދެމި އޮންނާނެ ކަމަށް އެ ފަރާތުން ބުންޏެވެ. ފާއިތުވި ދުވަސްތަކުގައި ރާއްޖެ އަންނަ ޓޫރިސްޓުންގެ އަދަދު މަދުވަމުން އަންނާތީ، ސަރުކާރުން އަންނަނީ ޓޫރިސްޓުން އިތުރު ކުރުމަށް ގިނަ މަސައްކަތްތަކެއް ކުރަމުންނެވެ.