ހޯމްލޭންޑް މިނިސްޓަރު އަލީ އިހްސާން މިއަދު ބޭއްވި ނޫސްވެރިންގެ ބައްދަލުވުމުގައި ވިދާޅުވީ، ބުލީކުރުމާއި އިޖުތިމާއީ މިންގަނޑުތަކާ ހިލާފު އަމަލުތައް ހުއްޓުވުމަށް ސަރުކާރުން މިހާރު ވަނީ ވަރުގަދަ މަސައްކަތްތަކެއް ފަށާފައެވެ. މިގޮތުން ބުލީކުރާ ފަރާތްތަކާ މެދު ޖިނާއީ ފިޔަވަޅު އެޅުމަށްޓަކައި އެޓާނީ ޖެނެރަލްގެ އޮފީހާއެކު ގާނޫނީ ގޮތުން ކުރެވިދާނެ ކަންކަން ދެނެގަތުމުގެ މަސައްކަތް ކުރަމުންދާ ކަމަށް މިނިސްޓަރު ފާހަގަކުރެއްވިއެވެ.
މިނިސްޓަރު އިތުރަށް ބަޔާންކުރެއްވި ގޮތުގައި، ބުލީގެ ޝިކާރައަކަށްވާ ފަރާތްތަކުގެ ފުރާނައަށް ނުރައްކާވާ ހިސާބަށް ކަންކަން ދާތީ، މިފަދަ ކުށްތަކަށް އެންމެ ހަރުކަށި އަދަބު ދިނުމަކީ ސަރުކާރުގެ އަމާޒެކެވެ. މިކަން ކުރުމަށްޓަކައި މިހާރު ހުރި ގާނޫނުތަކަށް ބަދަލު ގެންނަން ޖެހިއްޖެ ނަމަ، އެ އިސްލާހުތައް ގެނެސްގެން ނަމަވެސް ބުލީކުރުން ހުއްޓުވާނެ ކަމުގެ ޔަގީންކަން މިނިސްޓަރު ވަނީ ދެއްވާފައެވެ.
މީގެ އިތުރުން، ތައުލީމީ މުއައްސަސާތަކުގައި ހިނގާ މިފަދަ ހާދިސާތަކަށް ހާއްސަ ސަމާލުކަމެއް ދީގެން، ސްކޫލުތަކާއި ޔުނިވާސިޓީތަކަކީ ބުލީން ސަލާމަތްވެފައިވާ ތަންތަނަށް ހެދުމަށް ގިނަ މަސައްކަތްތަކެއް ރޭވިފައިވާ ކަމަށްވެސް މިނިސްޓަރު ވިދާޅުވިއެވެ. މުޖުތަމައުގެ އާންމު މަސްލަހަތާއި އަމާންކަން ގާއިމުކުރުމަށްޓަކައި، އިޖުތިމާއީ މިންގަނޑުން ބޭރުވާ ކޮންމެ އަމަލަކަށް ގާނޫނީ ހައްލެއް ހޯދުމަކީ ސަރުކާރުން ނުހަނު އިސްކަންދޭ ކަމެއްގެ ގޮތުގައި މިނިސްޓަރު ފާހަގަކުރެއްވިއެވެ.