މިއަހަރުގެ ނެއިލް އާޓްގެ ދުނިޔޭގައި އާ ވައްޓަފާޅިއެއް އުފެދި، "ބްލޫމިން ޖެލް" ޓްރެންޑު ވަނީ ވަރަށް ބޮޑަށް މަގުބޫލުވެއްޖެއެވެ. ޖަޕާނުން އުފަންވި މި ޓްރެންޑަކީ މިހާރު ސޯޝަލް މީޑިއާގައި އެންމެ ބޮޑަށް ވައިރަލްވަމުން އަންނަ އެކައްޗެވެ. މަޝްހޫރު ތަރިން ކަމުގައިވާ ޑުއާ ލިޕާ އާއި ހޭލީ ބީބާ ވެސް މި ސްޓައިލް ބޭނުންކުރަމުން ދިއުމާއެކު، އާންމުންގެ މެދުގައި މި ޓްރެންޑަށް އޮތް ޝައުގުވެރިކަން ވަނީ އިތުރުވެފައެވެ.
މި ޓްރެންޑަކީ ވަރަށް ފަސޭހައިން އަތްމަތީގެ ރީތިކަން ގެނެސްދޭ ކަމެކެވެ. މިއީ ވޯޓާ ކަލާ ޕެއިންޓިން އަކާއި އެއްފަދަ، ވަރަށް ތަފާތު އަދި ފްލޫއިޑް އިފެކްޓެއް ގެނެސްދޭ ޓެކްނިކެކެވެ. މީގެ ހާއްސަކަމަކީ ކޮންމެ ފަހަރަކު ވެސް ލިބެނީ މުޅިން ތަފާތު ނަތީޖާއެއް ކަމުން، ކޮންމެ މީހަކަށް ވެސް އަމިއްލަވަންތަ ގޮތަކަށް މި އާޓް ހެދޭނެ ކަމެވެ.
މި އާޓް ހެދުމަށްޓަކައި، ފުރަތަމަ ނިޔަފަތީގައި ބޭސް ކޯޓެއް ޖެހުމަށްފަހު، އެއަށްފަހު ބްލޫމިން ޖެލްގެ ފަށަލައެއް ޖަހަންވާނެއެވެ. އެ ޖެލް ނުހިއްކާ ހުއްޓައި އޭގެ މައްޗަށް ކުލަ ޖެލްތައް ލައްތަކެއްގެ ގޮތުގައި އެޅުމުން، އެ ކުލަތައް އަމިއްލައަށް ފެތުރިގެން ދެއެވެ. މިގޮތަށް ކުލަތައް ފެތުރުމުން، ކުލަގަދަ އަދި ތަފާތު ފަރުމާތައް އުފެދިގެން ދެއެވެ. އެއަށްފަހު ލައިޓް ބޭނުންކޮށްގެން އެ ހިއްކާލުމުން އާޓް ފުރިހަމަ ވީއެވެ.