މީޑިއާތައް ރެގިއުލޭޓުކުރުމުގެ ނަމުގައި މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނުން ހެދި ގަވާއިދަށް އަމަލުކުރަން މިއަދު ފަށައިފި އެވެ.
މި ގަވާއިދުގެ މައިގަނޑު ބޭނުމަކީ މީޑިއާތަކުން ފަތުރާ މައުލޫމާތާ ގުޅޭ ޝަކުވާތައް ބަލައި، ގާނޫނާ ހިލާފުވާ ހާލަތްތަކުގައި ފިޔަވަޅު އެޅުމެވެ.
މި އާ ގަވާއިދާއެކު، ކުރިން އޮތް ބްރޯޑްކާސްޓިން ކޮމިޝަނާއި މީޑިއާ ކައުންސިލް ވަނީ އުވިފަ އެވެ. ނަމަވެސް، މީޑިއާގެ މިނިވަންކަން ގެއްލިދާނެ ކަމުގެ ބިރު އެބަ އޮތް ކަމަށް ގިނަ ނޫސްވެރިންނާއި ބައިނަލްއަގުވާމީ ޖަމިއްޔާތަކުން ބުންޏެވެ. މި ގަވާއިދު ބާތިލުކުރަން ހައިކޯޓަށް ވެސް މައްސަލައެއް ވަނީ ހުށަހަޅާފަ އެވެ.
މި ގަވާއިދުގެ ދަށުން ބްރޯޑްކާސްޓަރުންނާއި ނޫސްވެރިންނަށް ބޮޑެތި ޖޫރިމަނާތައް ކުރެވޭނެ އެވެ. ބްރޯޑްކާސްޓަރުން 250،000 ރުފިޔާއާ ހަމައަށް އަދި ނޫސްތައް 100،000 ރުފިޔާއާ ހަމައަށް ޖޫރިމަނާ ކުރެވޭނެ އެވެ. އަދި ނޫސްވެރިންނަށް ވެސް ފިޔަވަޅު އެޅޭނެ ކަމަށް މި ގަވާއިދުގައި ބުނެފައިވެ އެވެ.