އިންޑިއާގެ އުއްދަނޑި ދަނޑުތަކުގައި މަސައްކަތްކުރާ އެތައް ސަތޭކަ އަންހެނުންނަކަށް، އެމީހުންގެ ވަޒީފާ ދެމެހެއްޓުމަށްޓަކައި ރަހިމު ނެގުމަށް މަޖުބޫރުކުރަމުންދާ ކަމުގެ ކަންބޮޑުވުންތައް ފާޅުކޮށްފިއެވެ. "ގާޑިއަން" އާއި "ހިއަރ ހަރ ސްޓޯރީޒް" އިން ރިޕޯޓްކޮށްފައިވާ ގޮތުގައި، މިއީ މަސައްކަތުގެ މާހައުލުގައި އެ އަންހެނުންނަށް ކުރިމަތިވަމުންދާ ވަރަށް ބޮޑު އިހާނެތިކަމެކެވެ.
މި އަންހެނުންނަކީ ދުވާލަކު 4 ޕައުންޑަށްވުރެ ކުޑަ އުޖޫރައަކަށް، ބަރު ތަކެތި އުފުލުމާއި އުއްދަނޑި ކެނޑުން ފަދަ ނުހަނު ބުރަ މަސައްކަތްތައް ކުރާ ބައެކެވެ. މަސައްކަތުގެ މާހައުލުގައި އޮންނަ ހަރުކަށި އުސޫލުތަކުގެ ސަބަބުން، މައްސަރު ކަންތަކާ ގުޅިގެން ނުވަތަ ހަށިގަނޑުގައި ރިއްސާތީ މަސައްކަތަށް ނުކުމެވޭ ކޮންމެ ދުވަހަކަށް އެމީހުން ބޮޑު އަދަދުން ޖޫރިމަނާ ކުރެއެވެ.
އެހެންކަމުން، ރަހިމު ނެގުމުގެ އޮޕަރޭޝަން ނުވަތަ ސާޖަރީ ހެދުމުން މައްސަރު ކަންތަކުން "ސަލާމަތްވެ"، މެދުކެނޑުމެއް ނެތި މަސައްކަތް ކުރެވޭނެ ކަމަށް ބުނެ އެމީހުންނަށް ވިސްނައިދީ، ސާޖަރީ ހެދުމަށް ބާރުއަޅުވައެވެ.
އިންޑިއާގެ ވަކިވަކި ޑިސްޓްރިކްޓްތަކުގެ ތަފާސްހިސާބުތަކަށް ބަލާއިރު، ބައެއް ސަރަހައްދުތަކުގައި މަސައްކަތްކުރާ އަންހެނުންގެ 36 އިންސައްތަ މީހުންގެ ރަހިމު ވަނީ ނަގާފައެވެ. މިއީ މުޅި އިންޑިއާގެ ނިސްބަތުން ރަހިމު ނަގާފައިވާ 3 އިންސައްތައާ އަޅާބަލާއިރު ނުހަނު މަތީ އަދަދެކެވެ. ރިޕޯޓްތައް ބުނާގޮތުން ވޭތުވެދިޔަ 10 އަހަރު ދުވަހުގެ ތެރޭގައި އެކަނިވެސް 13،000 އަށްވުރެ ގިނަ އަންހެނުން ވަނީ މި ސާޖަރީ ހަދާފައެވެ. މީގެ ތެރޭގައި އުމުރުން 25 އަހަރު ނުފުރޭ ޒުވާން އަންހެނުންވެސް ހިމެނެއެވެ.
މި ހިތްދަތި ހާލަތު ފެށެނީ އެ ކުދިންގެ ކުޑަކުދިންގެ އުމުރުގައެވެ. ގިނަ އަންހެން ކުދިން އުމުރުން އެންމެ 12 އަހަރުގައި ކައިވެނިކޮށް، ދަނޑުވެރިކަމުގެ ބުރަ މަސައްކަތަށް ނެރެއެވެ. މާބަނޑު ދުވަސްވަރާއި، ވިހެއުމަށްފަހު ލިބޭ ވަރުބަލިކަމާއި ތަދުތަކާއެކުވެސް އެމީހުން ލައްވައި މަސައްކަތް ކުރުވައެވެ. އުފެއްދުންތެރިކަން އިތުރުކުރުމުގެ ނަމުގައި، އެ އަންހެނުންގެ ހަށިގަނޑަކީ މަސައްކަތަށް އޮތް ހުރަހެއްގެ ގޮތުގައި ދެކި، އިންސާނިއްޔަތާ ހިލާފު މިފަދަ އަމަލުތައް ހިންގަމުންދާކަން މި ރިޕޯޓުން ވަނީ ހާމަވެފައެވެ.
މިއީ އިންޑިއާގެ އުއްދަނޑި ސިނާއަތުގައި މަސައްކަތްކުރާ އަންހެނުންގެ ހައްގުތަކަށް އަރައިގަނެ، އެމީހުންގެ ސިއްހަތަށް ބެލުމެއް ނެތި ހިންގަމުންދާ ވަރަށް ބޮޑު ލާއިންސާނީ އަމަލެއްގެ ގޮތުގައި އިންސާނީ ހައްގުތަކަށް މަސައްކަތްކުރާ ޖަމިއްޔާތަކުން ދަނީ ސިފަކުރަމުންނެވެ.