މެސެޗޫސެޓްސް އިންސްޓިޓިއުޓް އޮފް ޓެކްނޮލޮޖީ (އެމް.އައި.ޓީ) ގެ ސައިންސްވެރިން ވަނީ ސިކުނޑީގެ ދިރާސާތައް ކުރުމުގައި އިންގިލާބީ ބަދަލެއް ގެނުވާނެ ފަދަ އާ ހޯދުމެއް ހޯދާފައެވެ. މި ހޯދުމުގެ ސަބަބުން ސިކުނޑީގެ އެތެރޭގެ މަންޒަރުތައް މީގެ ކުރިން ނުފެންނަހާ ސާފުކޮށް އަދި އަވަސްކޮށް ބަލައިލުމުގެ މަގު ވަނީ ފަހިވެފައެވެ.
އެމް.އައި.ޓީ ގެ ސައިންސްވެރިން ކުރި ދިރާސާތަކުން ދައްކާގޮތުގައި، އާންމުކޮށް ފެތުރިގެންދާ "ކައޯޓިކް" ނުވަތަ ހަލަބޮލި ލޭޒާ އަލި، ވަކި ހާއްސަ ހާލަތްތަކެއްގައި ވަރަށް ބޮޑަށް އަމާޒުވެފައިވާ "ޕެންސިލް ބީމް" އެއްގެ ސިފައަށް އަމިއްލައަށް ބަދަލުވެއެވެ. މިކަން މިގޮތަށް މެދުވެރިވަނީ އަލި ފެތުރިގެން ދިއުމުގެ ބަދަލުގައި، އެކަށީގެންވާ މާހައުލެއްގައި އެއް މިސްރާބަކަށް އަމާޒުވުމުންނެވެ.
މި އާ "ޕެންސިލް ބީމް" ބޭނުންކޮށްގެން ސައިންސްވެރިން ވަނީ ސިކުނޑީގެ "ބްލަޑް-ބްރެއިން ބެރިއާ" (ލޭގެ ތެރެއިން ސިކުނޑިއަށް ތަކެތި ދިއުން ހުއްޓުވައިދޭ އައްޑަނަ) ގެ ތްރީ-ޑީ މަންޒަރުތައް ނަގާފައެވެ. މި އާ އުކުޅުގެ އެންމެ ފާހަގަކޮށްލެވޭ ކަމަކީ، މިހާރު ހުރި އެހެން ވަސީލަތްތަކަށްވުރެ 25 ގުނަ އަވަހަށް މަންޒަރުތައް ނެގުމުގެ ގާބިލުކަން މި އީޖާދަށް ލިބިގެންވުމެވެ.
މީގެ އިތުރުން، ބޭސްތައް ސިކުނޑީގެ ބައިތަކަށް ތަކަށް ވަންނަމުންދާ ގޮތް "ރިއަލް ޓައިމް" ނުވަތަ އެ ހިނދުން ހިނދަށް ބަލައިލުމުގެ ފުރުސަތު މިކަމުގެ ސަބަބުން ދިރާސާވެރިންނަށް ލިބިގެންދެއެވެ. މިއީ ނާރުގެ ބަލިތަކަށް ފަރުވާ ހޯދުމަށް ކުރެވޭ މަސައްކަތްތައް އެތައް ގުނައަކަށް ހަލުވިކޮށްދޭނެ ކަމެކެވެ.
މި އީޖާދުގެ ސަބަބުން ސިކުނޑިއަށް ޖެހޭ އެކި ބަލިތަކަށް ދެވޭ ފަރުވާތައް ތަރައްގީކުރުމުގައި ބޮޑެތި ކުރިއެރުންތަކެއް ލިބި، އިންސާނީ ސިއްހަތަށް ބޮޑެތި ފައިދާތަކެއް ކުރާނެ ކަމަށް ސައިންސްވެރިން އުންމީދު ކުރެއެވެ.
ހަވާލާ: ސައިންސް ޑެއިލީ 2026.