އިންޑިއާ އާއި ބަންގްލަދޭޝް ގުޅޭ ބޯޑަރު ސަރަހައްދުގައި ހިނގާ ގަވާއިދާ ހިލާފު ކަންތައްތައް ހުއްޓުވުމަށްޓަކައި، އެ ސަރަހައްދުގެ ކޯރުތަކާއި ފެންގަނޑުތަކަށް ކިނބުލާއި ވިހަގަދަ ހަރުފަ ދޫކުރުމުގެ އާދަޔާ ހިލާފު މަޝްރޫއެއް އިންޑިއާގެ އޮފިޝަލުން ރާވަމުންދާކަން ހާމަވެއްޖެއެވެ.
އަލްޖަޒީރާއިން ރިޕޯޓްކޮށްފައިވާ ގޮތުގައި، އިންޑިއާގެ ކަމާބެހޭ އިދާރާތަކުން މިފަދަ ނިންމުމެއް ނިންމަން އުޅެނީ ބޯޑަރު ސަރަހައްދުގައި ފެންސް ޖެހުމަށް ދަތި ކޯރުތަކާއި ފެންގަނޑުތަކުން މީހުން ހުރަސްކުރުން ހުއްޓުވުމުގެ ގޮތުންނެވެ. މި މަޝްރޫއުގެ ދަށުން ބޯޑަރުގެ ފެންގަނޑުތަކަށް ނުރައްކާތެރި ޖަނަވާރުތައް ދޫކޮށް، އެތަންތަނަކީ "ޤުދުރަތީ ހުރަހަކަށް" ހެދުމަށް ވަނީ ހުށަހަޅާފައެވެ.
މިކަން މިގޮތަށް ކުރަން ނިންމި މައިގަނޑު ސަބަބަކީ ބޯޑަރު ހުރަސްކޮށް ހިނގާ ވަގު ވިޔަފާރިތަކާއި، ހުއްދަނެތި މީހުން އެތެރެވުން ހުއްޓުވުމެވެ. ވަކިން ހާއްސަކޮށް، ފެންސް ޖަހަން އުނދަގޫ ހިސާބުތަކުގައި މިފަދަ ނުރައްކާތެރި ޖަނަވާރުތައް ތިބުމަކީ ބޯޑަރު ހުރަސްކުރަން އުޅޭ މީހުންނަށް އޮތް ބިރަކަށް ވާނެތީއެވެ.
ނަމަވެސް، އިންޑިއާގެ މި ހުށަހެޅުމާ ގުޅިގެން ގިނަ ބައެއްގެ ފާޑުކިޔުން ވަނީ އަމާޒުވެފައެވެ. އިންސާނީ ހައްގުތަކަށް މަސައްކަތް ކުރާ ފަރާތްތަކުން ބުނާ ގޮތުގައި މިއީ އިންސާނިއްޔަތާ ހިލާފު އަދި ނުރައްކާތެރި ފިޔަވަޅެކެވެ. މީގެ އިތުރުން، މިފަދަ ޖަނަވާރުތަކުގެ ސަބަބުން އެ ސަރަހައްދުގައި ދިރިއުޅޭ އާންމު ރައްޔިތުންނަށް ވެސް ބޮޑެތި ނުރައްކާތަކަކާ ކުރިމަތިލާން ޖެހިދާނެ ކަމުގެ ބިރު ވަނީ ހީވެފައެވެ.