"އަދަދު" ނޫހުން އާންމުކުރި ޑޮކިއުމެންޓަރީއާ ގުޅިގެން ކްރިމިނަލް ކޯޓުން ނެރުނު އަމުރަށް ފުރިހަމައަށް އަމަލުކުރުމަށް އިލެކްޝަންސް ކޮމިޝަން (އީސީ) އިން ސިޔާސީ ޕާޓީތަކަށާއި، ރާއްޖެ މީޑިއާ އެންޑް ބްރޯޑްކާސްޓިން ކޮމިޝަނުން މީޑިއާތަކަށް އަންގައިފިއެވެ. މިއީ މުޖުތަމައުގެ ތެރޭގައި އެ ވީޑިއޯ ދައުރުކުރުން ހުއްޓުވުމަށް އެޅި ފިޔަވަޅެކެވެ.
ކްރިމިނަލް ކޯޓުން ނެރުނު އަމުރުގައި އަންގާފައިވަނީ އެ ޑޮކިއުމެންޓަރީ މުޖުތަމައުގެ ތެރޭގައި ދައުރުކުރުން ވަގުތުން ހުއްޓާލުމަށެވެ. އަދި އޭގައި ހިމެނޭ އެއްވެސް ވާހަކައެއް ސީދާކޮށް ނުވަތަ ނުސީދާކޮށް ވެސް ނުދެއްކުމަށް ކޯޓުން ވަނީ އަމުރުކޮށްފައެވެ.
މިކަމާ ގުޅިގެން އީސީން ބުނީ، ސިޔާސީ ހަރަކާތްތައް ހިންގުމުގައި ކޯޓު އަމުރުގެ ހުދޫދުން ބޭރުނުވުމަށް ހުރިހާ ސިޔާސީ ޕާޓީތަކަށް މިހާރު އިރުޝާދު ދީފައިވާނެ ކަމަށެވެ. ހަމައެއާއެކު، މީޑިއާތަކުން ވެސް މި އަމުރަށް ބޯލެނބުމަށް ކަމާބެހޭ ކޮމިޝަނުން ވަނީ މީޑިއާތަކަށް އަންގާފައެވެ.
ކޯޓުގެ އަމުރުގައި ބަޔާންކޮށްފައިވާ ގޮތުން، ގަޒުފުގެ ކުށަކީ އިސްލާމީ ޝަރީއަތުގައި ބޮޑުވެގެންވާ ފާފައެކެވެ. މިއީ އިންސާނާގެ އަބުރާއި އިއްޒަތް ރައްކާތެރިކުރުމަށްޓަކައި ނަހީކުރައްވާފައިވާ ކަމެއް ކަމަށް އަމުރުގައި ފާހަގަކޮށްފައިވެއެވެ.
ކޯޓަކުން ކުށް ސާބިތުނުވާހާ ހިނދަކު، ކޮންމެ މީހަކީ ވެސް ކުށެއް ނެތް މީހެއްގެ ގޮތުގައި ބެލުމުގެ ހައްގު ގާނޫނީ ގޮތުން އޮންނަންވާނެ ކަމަށް ވެސް އެ އަމުރުގައި ވަނީ ބަޔާންކޮށްފައެވެ. އަދި މައްސަލައިގައި ހިމެނޭ މީހުންގެ ވާހަކަ އެ ޑޮކިއުމެންޓަރީއާ ގުޅުވައިގެން ނުދެއްކުމަށާއި، ޝަރީއަތުގެ މައުލޫމާތު އާންމު ނުކުރުމަށް ވެސް ކޯޓުން ވަނީ އަންގާފައެވެ.