ރާއްޖޭގެ އެންމެ ބޮޑު ވިޔަފާރި ކުންފުނި، ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) ގެ މުވައްޒަފުންގެ ދުޅަހެޔޮކަމަށް އިސްކަންދިނުމުގެ ގޮތުން، އެ ކުންފުނީގެ މުވައްޒަފުންނަށް އަމާޒުކޮށްގެން ޚާއްސަ އައިނު ސްކްރީނިންގ ޕްރޮގްރާމެއް ކުރިއަށް ގެންގޮސްފިއެވެ.
އޭޑީކޭ ހޮސްޕިޓަލުގެ އެހީތެރިކަމާއެކު ކުރިއަށް ގެންދިޔަ މި ޕްރޮގްރާމްގައި، އެސްޓީއޯގެ މުވައްޒަފުންގެ ލޮލުގެ ސިއްހީ ހާލަތު ދެނެގަތުމަށް ތަފާތު ސްކްރީނިންގ ޓެސްޓުތައް ވަނީ ހަދައިދީފައެވެ. މީގެ ތެރޭގައި ލޮލުގެ ފެނުމުގެ ކޮލިޓީ ބެލުމާއި، ލޮލަށް ދިމާވެދާނެ އެކި މައްސަލަތައް ދެނެގަތުމުގެ ސްކްރީނިންގތައް ހިމެނެއެވެ.
އެސްޓީއޯ އިން ފާހަގަކުރި ގޮތުގައި، ގިނަ ވަގުތު ޑިޖިޓަލް ސްކްރީންތަކަށް ބަލަހައްޓައިގެން މަސައްކަތްކުރާ މުވައްޒަފުންނަށް ލޮލުގެ ސިއްހަތަށް ސަމާލުކަން ދިނުމަކީ ވަރަށް މުހިންމު ކަމެކެވެ. އެހެންކަމުން މި ޕްރޮގްރާމްގެ މައިގަނޑު އެއް މަގްސަދަކީ ސްކްރީންތަކަށް ބެލުމުން ލޮލަށް ލިބޭ ބުރަ ކުޑަކޮށް، ލޮލުގެ ސިއްހަތު ރަނގަޅު ހާލަތެއްގައި ބެހެއްޓުމަށް މުވައްޒަފުން ހޭލުންތެރިކުރުވުމެވެ.
މި ޕްރޮގްރާމްގެ ތެރެއިން އޭޑީކޭގެ ތަޖުރިބާކާރު ފަންނީ ޓީމުން ވަނީ ސްކްރީން ކުރި މުވައްޒަފުންނަށް ލޮލުގެ ސިއްހަތާ ގުޅޭ އިރުޝާދާއި، ދިރިއުޅުމުގެ ވައްޓަފާޅިއަށް ގެންނަންވީ ބަދަލުތަކުގެ މައުލޫމާތު ވެސް ހިއްސާކޮށްފައެވެ.
ކުންފުނީގެ މުވައްޒަފުންގެ ދުޅަހެޔޮކަމަށް މިފަދަ ސްކްރީނިންގ ޕްރޮގްރާމްތައް ހިންގުމަކީ ދުނިޔޭގެ ކުރިއަރާފައިވާ ކުންފުނިތަކުން ވެސް އަމަލުކުރަމުން އަންނަ ކާމިޔާބު ސިޔާސަތެކެވެ.