ޖަޕާނުގެ އެތައް ހާސް ބައެއްގެ ޖީނޯމް ތަހުލީލުކޮށްގެން ސައިންސްވެރިން ވަނީ އެ ގައުމުގެ އާބާދީގެ އަސްލާ ބެހޭ ގޮތުން މީގެ ކުރިން އެނގިފައި ނުވާ އައު ހޯދުންތަކެއް ހޯދާފައެވެ. ޖަޕާނުގެ ރިކެން ރިސާޗް އިންސްޓިޓިއުޓުން ދާދިފަހުން ހާމަކުރި ގޮތުގައި، ޖަޕާނުގެ ރައްޔިތުން އުފެދިގެން އައީ މީގެ ކުރިން ގަބޫލުކުރަމުންދިޔަ ދެ ނަސްލެއްގެ ބަދަލުގައި، ތިން ނަސްލެއް އެކުވެގެންނެވެ. އަލަށް ފާހަގަކުރެވުނު ތިންވަނަ ކާބަފައިންގެ ގްރޫޕަކީ ޖަޕާނުގެ އިރުއުތުރު ސަރަހައްދުގައި ދިރިއުޅުނު ގަދީމީ "އެމިޝީ" ރައްޔިތުންނާ ގުޅުންހުރި ބައެއްކަން ދިރާސާއިން ދައްކާފައިވާއިރު، މިއީ ޒަމާނުއްސުރެ ގަބޫލުކުރަމުން އައި "ޑުއަލް އޮރިޖިންސް" ނުވަތަ ދެ އަސްލުގެ ތިއަރީއަށްލިބުނު ބޮޑު ގޮންޖެހުމެކެވެ.
މި ބޮޑު ޑީ.އެން.އޭ ދިރާސާއިން ސައިންސްވެރިންނަށް ވަނީ މެޑިކަލް ސައިންސްގެ ދާއިރާއިންވެސް މުހިންމު މައުލޫމާތުތަކެއް ލިބިފައެވެ. އެގޮތުން ޖަޕާނުގެ މީހުންގެ ހަށިގަނޑުން ގަދީމީ އިންސާނުންގެ ބާވަތްތަކެއް ކަމަށްވާ "ނިއަންޑަރތާލް" އަދި "ޑެނިސޯވަން" ގެ ޑީ.އެން.އޭ ވާރުތަކޮށްފައިވާކަން ވަނީ ހޯދާފައެވެ. ސައިންސްވެރިން ފާހަގަކުރި ގޮތުގައި، ވާރުތަކޮށްފައިވާ މި ގަދީމީ ޑީ.އެން.އޭގެ ސަބަބުން މިޒަމާނުގެ ޖަޕާނު މީހުންނަށް ހަކުރުބަލި، ހިތުގެ ބަލިތައް، އަދި ކެންސަރު ފަދަ ނުރައްކާތެރި ބަލިތައް ޖެހުމުގެ ފުރުސަތު ބޮޑުވެއެވެ. މިއީ ޖަޕާނުގެ ނަސްލީ ތާރީޚު އޮޅުންފިލުވައިދިނުމުގެ އިތުރުން، ބަލިތަކުން ރައްކާތެރިވުމަށް ކުރާ މެޑިކަލް ދިރާސާތަކަށް ލިބުނު ވަރަށް ބޮޑު ކުރިއެރުމެކެވެ.