ފޮތެއްގެ ބޭރުން އަހަރެމެންނަށް ތަފާތު މަންޒަރުތަކެއް ދައްކުވާފާނެއެވެ. އަދި އެއް ފޮތެއްގެ ބޭރުގަނޑުން އެކި މީހުންނަށް އެކި ތަސްވީރު އެމީހުންގެ ހިތުގައި ކުރެހިދާނެއެވެ. ނަމަވެސް ވިސްނާފިކުރު ކުރަންވީ އެ ފޮތުގެ ބޭރުގަނޑާއި މެދަކު ނޫނެވެ. ހިޔާލާ ފިކުރު ގެންގުޅެންވީ އެ ފޮތުގެ ބޭރުގަނޑުގަ އެކަންޏެއް ނޫނެވެ. އެއަށްވުރެ މި އިންސާނާގެ ވިސްނުން ފުޅާވެފާ ތަނަވަސް ވާން ޖެހޭނެއެވެ. އިންސާނުންނާއި ޖަނަވާރުން ތަފާތު ކުރުވާ އެއް ސިފަ އަކީ އެއީއެވެ. 

ފޮތެއްގެ ބޭރުގަނޑަކުން، އެ ފޮތުގެ ހަގީގީ އަގެއް، ނުވަތަ އެފޮތެއްގެ މުއްސަނދިކަމެއް ނޭނގޭނެއެވެ. އަދި ފޮތަކުން ކިޔައިދޭ ވާހަކައަކާއި ލިބެންވީ އިބުރަތެއްވެސް ނޭނގޭނެއެވެ. ފޮތެއްގެ ބޭރުގަނޑެކޭ އެއްފަދައިން ހަބަރާއި މައުލޫމާތު އެކުލެވޭ ލިއުންތަކުގެ ސުރުހީތަކަކީވެސް މިފަދަ އެއްޗެކެވެ. އެ ހަބަރެއް ނުވަތަ މަޒުމޫނެއްގެ ސުރުހީ އަކުން އެ ހަބަރެއްގެ ތަފްސީލެއް ނުވަތަ އެ މަޒުމޫނެއްގެ ތަފްސީލެއް ނުލިބޭނެއެވެ. އެކަން އެގޮތަށް ހިނގާނަމަ، ހަބަރުތަކުގެ ތަފްސީލު ގެނެސްދިނުމެއް ނުވާނެއެވެ. އަދި ތިން ހަތަރު ސަފްހާގެ މަޒުމޫނުތައް ލިޔުމެއްވެސް ނުވީހެވެ.

ކަންމިހެން ހުރިނަމަވެސް، މި ތަހުޒީބު ދުނިޔޭގައި މިކަމާ އިދިކޮޅު ބަޔަކު އެބައުޅެއެވެ. ފޮތެއްގެ ބޭރުގަނޑުން އެ ފަތުގެ މުއްސަނދިކަން މިނެ ކިރާ މީހުންނެވެ. ހަބަރެއްގެ ސުރުހީއިން، އެ ހަބަރަކީ ނަފްރަތާއި ފިތުނައިގެ ހަބަރެއް ކަމަށް ބުނާ މީހުންނެވެ. މަޒުމޫނެއްގެ ސުރުހީއިން، އެ މަޒުމޫނެއްގެ ކޮޅު ބުނާ މީހުންނެވެ. އެ މީސް މީހުންގެ މިނެ ކިރުމުގެ ކައްޓާގައި މިއުޅެނީ ކޮން މައްސަލައެއްތޯއެވެ؟

ދިރިއުޅުމުގެ އެކި މަސައްކަތްތަކުގައި އަވަދިނެތި އުޅެންޖެހޭ، ކާރޫ ބާރޫ ބޮޑު މި ދިރިއުޅުމުގައި އެފަދަ ފޮތެއް ހުޅުވާލައިގެން ކިޔާނޭ ވަގުތު ނުވަނީ ކަމަށް ވެދާނެއެވެ. ހަބަރެއްގެ ތަފްސީލު ކިޔާލާނޭ ވަގުތު ނުވަނީ ކަންނޭނގެއެވެ. މަޒުމޫނެއްގެ ޕެރެގުރާފުތަކަށް ކަޅިއެއް އެއްލަން އަވަދި ނުވަނީ ކަމަށް ވެދާނެއެވެ. އެހެން ނަމަވެސް އެ މީހުންނަކީ ފޮތްތަށް ބެލުމަށް ނިކަން ޝައުގުވެރިވާ ބައެކެވެ. ނަމަވެސް ފޮތުގެ ބޭރުގަނޑަށެވެ. އަދި އެހާމެ ހަބަރު ކިޔާހިތްވާ ބައެކެވެ. ނަމަވެސް ހަބަރުގެ ސުރުހީ އެކަންޏެވެ. މީގެ އިތުރުން މަޒުމޫނުވެސް ނިކަން ކިޔާ ހިތްވާ ބައެކެވެ. ނަމަވެސް މަޒުމޫނެއްގެވެސް ސުރުހީ އެކަންޏެވެ.

މިކަމުން ހާމަވެގެންދަނީ އެމީސް މީހުންގެ އަދުލުވެރިކަން ނެތްކަމެވެ. އެ މީހުންގެ ސިކުނޑީގައި ތެތްކަމެއް ނެތްކަމެވެ. މިކަމުން އިނގިގެން ދަނީ ތަހުޒީބާއި ނާތަހުޒީބުގެ ތަފާތެވެ.

ހަގީގަތުގައި ފޮތަކާއި މެދު ބަހެއް ބުނެވޭނީ އެ ފޮތެއް އެއްކޮށް ކިޔާ ނިންމާފައެވެ. އަދި ހަބަރަކާއި މެދު ގޮތެއް ކަނޑައެޅޭނީ ހަބަރުގެ ތަފްސީލު އެނގިގެންނެވެ. ހަމަ އެއާއެކު މަޒުމޫނެއްގެ މިސްރާބު ވަޒަން ކުރެވޭނީ އެ މަޒުމޫނެއް ކިޔާ އޭގައި ބުނާ އެއްޗެއް ދޭހަވެގެންނެވެ. މި ނޫން ގޮތަކަށް މިކަންތައް ކުރާ މީހުންނީ އެމީހުންގެ އަމިއްލަ ދިރިއުޅުމުގައިވެސް އެފަދައިން ވެއްޖެ މީހެއްކަން ހަމަ ޔަގީނެވެ.