ސައުދީ އަރަބިއްޔާގައި ރައްޓެހިންތަކެއްގެ މެދުގައި މަޖަލަކަށް ފެށި ސަމާސާއެއް ބޮޑު މުސީބާތަކަށް ބަދަލުވެ، އެންމެ ފަހުން މީހަކު ސަލާމަތްކުރުމަށްޓަކައި ބޮޑެތި މެޝިނަރީއާއި ކްރޭނެއް ބޭނުންކުރަން ޖެހިއްޖެއެވެ. މި ހާދިސާ ހިނގާފައިވަނީ އެ ގުރޫޕުން އެމީހުންގެ އެކުވެރިޔަކު ކޮއްޕާލާފައި ފެންނެތް ހުސް ސްވިމިން ޕޫލެއްގެ ތެރެއަށް ވައްޓާލުމުންނެވެ. ފުރަތަމަ އެންމެން ހީ މަޖާކުރި ނަމަވެސް، ހަށިގަނޑުން ތަންކޮޅެއް ބިޔަ މި އެކުވެރިޔާ ގޮސް ސްވިމިން ޕޫލުގައި މުޅިން ތާށިވުމުން ކަންކަން ސީރިއަސްވިއެވެ.
އޭނާ ތާށިވި ވަގުތު، އެ ގުރޫޕުގެ އެހެން ކުއްޖަކުވެސް އޭނާގެ ފަހަތުން އެ ޕޫލުގެ ތިރިއަށް ކައްސާލައިގެން ދިޔައެވެ. ނަމަވެސް، ފަހުން ދިޔަ ކުއްޖާއަށް އަމިއްލައަށް ސަލާމަތްވެގެން އެރުނު އިރު، ތާށިވި މީހާއަށް ކުޑަކޮށްވެސް ގުޑާލެވޭ ގޮތެއް ނުވިއެވެ. މަޖާ ދަނޑިވަޅު ކުއްލިއަކަށް ބިރުވެރިކަމަކަށް ބަދަލުވެ، އެކުވެރިޔާ އެތަނުން ނެރެވޭނެ އެއްވެސް ގޮތެއް ނެތުމުން، އެންމެ ފަހުން ރެސްކިއު ޓީމުތަކަށް ގުޅައިގެން ބޮޑު ކްރޭނެއް އެ ސަރަހައްދަށް ގެންނަން މަޖުބޫރުވިއެވެ.
މި އާދަޔާ ހިލާފު ސަލާމަތްކުރުމުގެ އޮޕަރޭޝަންގެ ވީޑިއޯތައް މީސްމީޑިއާގައި ދައުރުވާން ފެށުމާއެކު، މިއީ މުޅި އިންޓަނެޓް ސިއްސުވާލި އަދި އެހާމެ މަޖާ ހާދިސާއަކަށް ވަނީ ވެފައެވެ. ގިނަ ބަޔަކު ދަނީ ސަމާސާ ކުރުމުގައިވެސް ރައްކާތެރިކަމުގެ ބައެއް ގެންގުޅުމަށް ނަސޭހަތްތެރިވަމުންނެވެ. ކްރޭން ބޭނުންކޮށްގެން ކުރި މަސައްކަތަކުން އެމީހާ ސަލާމަތްކުރެވުނު ނަމަވެސް، މިއީ އެކުވެރިންގެ މެދުގައި ކުރެވުނު ސަމާސާއެއް ހައްދުފަހަނައަޅައިދިއުމުން ލިބުނު ބޮޑު ލަދެއްގެ ގޮތުގައި ގިނަ ބަޔަކު ސިފަކުރެއެވެ.