ރާއްޖޭގެ ނުވަވަނަ ކޮމާޝަލް ބޭންކުގެ ގޮތުގައި އުފެއްދުމަށް ހުއްދަ ދީފައިވާ މޯލްޑިވްސް ޕްރިމިއަ ބޭންކް (އެމްޕީބީ) އިން މިއަދު ރަސްމީކޮށް ހިދުމަތް ދޭން ފަށައިފިއެވެ. މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އިއްޔެ ބޭންކިން ލައިސަންސް ދިނުމާ ގުޅިގެން، އެމްޕީބީ އިން މިއަދު ވަނީ ސޮފްޓް އޯޕެނިންގްއަކާ އެކު ކަސްޓަމަރުންނަށް ހިދުމަތްތައް ހުޅުވާލާފައެވެ.
އެ ބޭންކުން ނެރުނު ނޫސް ބަޔާނެއްގައި ބުނީ، އެމްޕީބީގެ މައިގަނޑު ތަސައްވުރަކީ ގުޅުން ބަދަހި ބޭންކިން ހިދުމަތްތަކާއި، ވަރުގަދަ ގަވަނަންސް، އިންޓަނޭޝަނަލް އެންމެ ރަނގަޅު އުސޫލުތައް އަދި ފަރުމާ ފުރިހަމަ ޓެކްނޮލޮޖީ އެއްކޮށްލައިގެން ކަސްޓަމަރުންނަށް އިސްކަންދޭ ޒަމާނީ ބޭންކިން ތަޖުރިބާއެއް ރާއްޖެއަށް ގެނެސްދިނުން ކަމަށެވެ. އަދި ކަސްޓަމަރުންނާއި ދިވެހި އިގްތިސާދަށް ފެންވަރު ރަނގަޅު ހިދުމަތްތަކާއި ދިގުމުއްދަތުގެ މަންފާ ފޯރުކޮށްދޭ، އިތުބާރު ހުރި މާލީ އިދާރާއަކަށް ވުމަށް ބޭންކުން މަސައްކަތް ކުރާނެ ކަމަށް ވެސް ބުނެފައިވެއެވެ.
އެމްޕީބީގެ ޑިރެކްޓަރުންގެ ބޯޑުގެ ނޮން-އެގްޒެކެޓިވް ޗެއާޕާސަންގެ މަގާމަށް އައިޝާ ނުރައިން ޖަނާހް އައްޔަންކޮށްފައިވާއިރު، ބޯޑުގައި ރަހީމާ ސަލީމް، މަރިޔަމް ޝާހިދާ މުހައްމަދު، އިސްމާއިލް އަލީ މަނިކު، މުހައްމަދު հުސައިން މަނިކު އަދި ސުޖާތާ ހަލީމް ހިމެނިވަޑައިގަންނަވައެވެ. ބޭންކުން ބުނި ގޮތުގައި މެނޭޖްމަންޓް ޓީމަކީ ބޭންކިން ޓެކްނޮލޮޖީ، އޮޕަރޭޝަންސް، ރިސްކް، އަދި ހިއުމަން ރިސޯސަސްގެ ދާއިރާތަކުން އޭޝިއާ، އެފްރިކާ، ޔޫރަޕް އަދި ޕެސިފިކް ހިމެނޭހެން ދުނިޔޭގެ 14 ގައުމެއްގައި މަސައްކަތްކޮށް، ފުޅާ ދާއިރާއެއްގައި އިންޓަނޭޝަނަލް ތަޖުރިބާ ހޯދާފައިވާ މާހިރުންނެވެ.