އެމެރިކާގެ ރައީސް ޑޮނަލްޑް ޓްރަމްޕް މި ހަފުތާގައި އީރާނަށް ދޭން ރާވާފައިވާ ޙަމަލާއެއް ފަސްކޮއްފި ކަމަށް "މިޑްލް އީސްޓް އައި" އިން ހާމަކޮށްފިއެވެ. ޓްރަމްޕް މި ޙަމަލާ ފަސްކުރީ ޙައްޖުގެ މަތިވެރި އަޅުކަން ހިނގަމުންދާ ދުވަސްވަރު އީރާނާ ދެކޮޅަށް ހަނގުރާމަ ފެށުމަކީ ރަނގަޅު ކަމެއް ނޫން ކަމަށް ވިދާޅުވެ، އެމެރިކާގެ އިސް އޮފިޝަލުންނާއި ޚަލީޖުގެ ބާރުގަދަ ބައެއް ޤައުމުތަކުން ދިން އިންޒާރުތަކާ ގުޅިގެންނެވެ.
ޚަލީޖުގެ އިސް ދެ އޮފިޝަލަކު މައުލޫމާތު ދެއްވި ގޮތުގައި، ޢީދުލްއަޟްޙާގެ ބަރަކާތްތެރި މުނާސަބަތާ ދިމާކޮށް އީރާނަށް ޙަމަލާދީފިނަމަ، ޚަލީޖުގެ ޤައުމުތަކުގައި ބޮޑު ސަލާމަތީ ކާރިސާއެއް އުފެދިދާނެ ކަމުގެ ބިރު އޮތް ކަމަށް ޓްރަމްޕަށް ވަނީ އަންގާފައެވެ. ޚާއްޞަކޮށް، މި ހަނގުރާމައިގެ ސަބަބުން ވައިގެ ދަތުރުފަތުރުތަކަށް ބުރޫއަރައި، ޙައްޖުގެ އަޅުކަމަށް ގޮސްތިބި އެތައް ލައްކަ ޙައްޖުވެރިންނެއް އެ ޤައުމުތަކުގައި ތާށިވެދާނެ ކަމުގެ ކަންބޮޑުވުން ފާޅުކުރިއެވެ. މީގެ އިތުރުން، މިފަދަ މުޤައްދަސް ދުވަސްވަރެއްގައި ޙަމަލާދިނުމަކީ އިސްލާމީ ދުނިޔޭގައި ވޮޝިންގްޓަނަށް އޮތް ގަދަރާއި އިތުބާރު މުޅިން ގެއްލިގެންދާނެ ކަމެއް ކަމަށްވެސް ބުނެފައިވެއެވެ.
އެމެރިކާ ސަރުކާރުގެ އިސް އޮފިޝަލަކުވެސް ވަނީ މިފަދަ މަޝްވަރާތަކެއް ހިނގާފައިވާކަން ކަށަވަރުކޮށްދީފައެވެ. އޭނާ ވިދާޅުވި ގޮތުގައި، އެމެރިކާއާއި އިސްރާއީލް ގުޅިގެން މި ވަގުތު ހަނގުރާމަ ފަށައިފިނަމަ، ރައީސް ޓްރަމްޕުގެ އަމިއްލަ އަބުރަށާއި މަޤުބޫލުކަމަށް ބޮޑެތި ގެއްލުންތަކެއް ލިބޭނެ ކަމަށް އޮފިޝަލުން ބުނެފައިވެއެވެ. މީގެ ކުރިން އެމެރިކާއިން ރަމަޟާން މަހުގެ ތެރޭގައި އީރާނަށް ޙަމަލާދީފައިވީ ނަމަވެސް، ކޮންމެ އަހަރަކު އެތައް މިލިއަން ބޭރުގެ ޙައްޖުވެރިންނަކަށް މަރުޙަބާ ކިޔާ ސައުދީ އަރަބިއްޔާއަށް، ޙައްޖު ގަޑީގައި މިފަދަ ހަނގުރާމައެއް ފެށުމަކީ ލޮޖިސްޓިކަލް ގޮތުން ނުއުފުލޭނެ ފަދަ ބޮޑު ބުރައަކަށް ވާނެއެވެ. މީގެ އަސަރު ޤަޠަރާއި ޔޫ.އޭ.އީ ފަދަ ޚަލީޖުގެ އެހެން ޤައުމުތަކުގެ ވައިގެ ދަތުރުފަތުރަށްވެސް ކުރާނެއެވެ.