އިންޑިއާއިން ޖަޕާނަށް ތާޒާ އަނބު އެތެރެކުރުން، ފާއިތުވި 20 އަހަރުގެ ތެރޭގައި ފުރަތަމަ ފަހަރަށް ޖަޕާނު ސަރުކާރުން ކުއްލި ގޮތަކަށް ސަސްޕެންޑް ކޮށްފިއެވެ. ޖަޕާނުގެ ކަރަންޓީނު އިންސްޕެކްޓަރުން އިންޑިއާގެ އަނބު ޕްރޮސެސްކުރާ ފެސިލިޓީތައް ބެލުމަށްފަހު، އެތަންތަނުގެ ސާފުތާހިރުކަމާއި ޖަރާސީމު ނައްތާލުމުގެ ނިޒާމުގައި ބޮޑެތި އުނިކަންތައްތަކެއް ހުރިކަން ފާހަގަކޮށް، 2026 ވަނަ އަހަރުގެ އަނބު މޫސުމުގައި އިންޑިއާގެ އަނބު އެތެރެކުރުން ވަނީ މުޅިން މަނާކޮށްފައެވެ. މިއީ އިންޑިއާގެ އަނބު އެކްސްޕޯޓްކުރާ ވިޔަފާރިވެރިންނަށް ލިބުނު ވަރަށް ބޮޑު ހިތްދަތި ހަބަރެކެވެ.
މި މައްސަލަ ފެންމަތިވީ މިއަހަރުގެ މާރިޗު މަހު ޖަޕާނުގެ ކަރަންޓީނު އޮފިޝަލުން އިންޑިއާގެ އުއްތަރަ ޕްރަދޭޝްގެ ރެހްމާންޕޫރުގައި ހުންނަ "ވޭޕަރ ހީޓް ޓްރީޓްމަންޓް" ފެސިލިޓީއަކަށް ކުރި އަހަރީ ބަލައިފާސްކުރުމުގެ ތެރޭގައެވެ. ވީއެޗްޓީ އަކީ ކެމިކަލް ބޭނުންކުރުމެއްނެތި، ހޫނު އަދި ތެތް ވައިގެ އެހީގައި އަނބުގައި ހުންނަ ފަނިފަކުސާއާއި ބަލިތައް ނައްތާލުމަށް ބޭނުންކުރާ ސައްހަ ނިޒާމެކެވެ. ނަމަވެސް، އެ ފެސިލިޓީގެ ދުންޖެހުމާއި ޑިސްއިންފެކްޓް ކުރުމުގެ މަރުހަލާތައް ޖަޕާނުގެ މިންގަނޑުތަކަށް ފިޓްނުވާތީ، ޖަޕާނުގެ "ޔޮކޮހާމާ ޕްލާންޓް ޕްރޮޓެކްޝަން އެސޯސިއޭޝަން" އިން ވަނީ 25 މާރިޗު 2026 ގެ ފަހުން ދޫކޮށްފައިވާ ސެޓްފިކެޓްތަކުގެ ދަށުން އަންނަ އެއްވެސް އަނބުގެ ޝިޕްމަންޓެއް ބަލައިނުގަންނަން ނިންމާފައެވެ.
މި ބޮޑު ސަސްޕެންޝަންގެ ފަހަތުގައިވާ އެންމެ ބޮޑު ސަބަބަކީ "ފްރޫޓް ފްލައި" ނުވަތަ މޭވާ ފަންޏެވެ. މިއީ ދުނިޔޭގެ ދަނޑުވެރިކަމަށް އޮތް އެންމެ ބޮޑު އެއް ނުރައްކަލެވެ. މި ފަނިތައް މޭވާގެ އެތެރޭގައި ބިސްއަޅައި، އޭގެ ލާވާތައް އުފެދި މޭވާ އެތެރެއިން ހަލާކުކޮށްލައެވެ. ޖަޕާނަކީ ދަނޑުވެރިކަމުގެ ރައްކާތެރިކަމަށް އާދަޔާޚިލާފަށް ހަރުކަށި އުސޫލުތަކެއް ގެންގުޅޭ ގައުމަކަށްވުމުން، އިންޑިއާގެ އަނބުން އެގައުމުގެ އަމިއްލަ ދަނޑުވެރިކަމަށް ބަލިމަޑުކަމެއް ފެތުރިދާނެތީ މި ފިޔަވަޅު އެޅީއެވެ. މިއަހަރުގެ ޝިޕްމަންޓްތަކުން ސީދާ ފަނި ފެނިގެން ނޫން ނަމަވެސް، ރައްކާތެރިކަމުގެ ނިޒާމު ބަލިކަށިވުމުން ޖަޕާނުން ރިސްކެއް ނަގާކަށް ބޭނުމެއް ނުވިއެވެ.
މި ނިންމުމުގެ ސަބަބުން އިންޑިއާގެ އެންމެ މަޝްހޫރު އަދި އަގުބޮޑު އަނބުގެ ބާވަތްތައް ކަމަށްވާ އަލްފޮންސޯ، ކޭސަރް، ލަންގްރާ، އަދި ބަންގަނަޕައްލީ ޖަޕާނުގެ ބާޒާރަށް އެތެރެކުރުން ވަނީ މަނާވެފައެވެ. މިއީ އިންޑިއާގެ އަނބު އެންމެ ގިނައިން ބޭރުކުރާ ޕީކް ސީޒަން ކަމަށްވާ އެޕްރީލް މަހުން ފެށިގެން ޖޫން މަހުގެ ނިޔަލަށް ދިމާވި ކަމަކަށް ވުމުން، އެތައް މިލިއަން ޑޮލަރެއްގެ ގެއްލުން ވިޔަފާރިވެރިންނަށް ވާނެއެވެ.
މިއީ ތާރީޚީ ގޮތުން ބަލާއިރު އިންޑިއާގެ އަނބު ވިޔަފާރިއަށް ކުރިމަތިވި ދެވަނަ ބޮޑު ހުރަހެވެ. މީގެ ކުރިން 1986 ވަނަ އަހަރުވެސް މިފަދަ މޭވާ ފަނީގެ ބިރުވެރިކަމާ ހެދި ޖަޕާނުން އިންޑިއާގެ އަނބު ބޭންކުރިއެވެ. އެ ފަހަރުގެ ބޭން މުޅިން އުވާލައި، އަލުން ވިޔަފާރި ފެށުނީ ސައްހަ ސައިންޓިފިކް ދިރާސާތަކާއި ކަރަންޓީނު ނިޒާމު ވަރުގަދަކުރުމަށްފަހު، ބަރާބަރު 20 އަހަރު ފަހުން 2006 ވަނަ އަހަރުގައެވެ. ނަމަވެސް، 20 އަހަރު ވަންދެން ހިފަހައްޓާފައި އޮތް މި ދޮރު އަނެއްކާވެސް މިވަނީ ބަންދުވެފައެވެ.
މި ސަސްޕެންޝަން ކުރިމަތިވީ އިންޑިއާގެ އަނބު ދަނޑުވެރިންނަށް އެހެން ގޮތްގޮތުންވެސް ބޮޑެތި ގޮންޖެހުންތަކެއް ކުރިމަތިވެފައިވާ ދަނޑިވަޅެއްގައެވެ. އިންޑިއާއަށް ކުރިމަތިވެފައިވާ ބާރުގަދަ ހީޓްވޭވް ނުވަތަ ހޫނުގަދަވުމުގެ ސަބަބުން އަނބު ދަނޑުތައް ހަލާކުވެ، މިއަހަރުގެ އުފެއްދުންތެރިކަން ވަނީ ވަރަށް ބޮޑަށް ދަށްވެފައެވެ. މީގެ އިތުރުން، މެދުއިރުމަތީގެ ހަމަނުޖެހުންތަކާ ގުޅިގެން ކަނޑުގެ މަގުން މުދާ އުފުލުމުގެ ޚަރަދުތަކާއި ކޮންޓޭނަރުގެ އަގުތައް ވަނީ އިންތިހާއަށް މަތިވެފައެވެ.
އިންޑިއާގެ މޭވާ އެކްސްޕޯޓްކުރާ ޖަމިއްޔާތަކުން ބުނާ ގޮތުގައި، މިހާރު ޖަޕާނުގެ ކަމާބެހޭ ފަރާތްތަކާއެކު މި މައްސަލައަށް ހައްލެއް ހޯދުމަށް މަޝްވަރާތައް ދަނީ ކުރެވެމުންނެވެ. ނަމަވެސް، ޖަޕާނުގެ "ޔޮކޮހާމާ ޕްލާންޓް ޕްރޮޓެކްޝަން" އިން ހާމަކުރާ ގޮތުގައި، އިންޑިއާގެ ފެސިލިޓީތަކުގެ އޮޕަރޭޝަނަލް މިންގަނޑުތައް ރަނގަޅުވެ، ޖަޕާނުން ހިތްހަމަޖެހޭ ފެންވަރަކަށް ސާފުތާހިރުކަން ކަށަވަރުނުވަނީސް މި ސަސްޕެންޝަން އުވައެއް ނުލާނެއެވެ. އެހެންކަމުން މިއަހަރުގެ އަނބު މޫސުމުގައި ޖަޕާނުގެ މާކެޓުން އިންޑިއާގެ އަނބު ފެނުމުގެ ފުރުސަތު ވަރަށް ކުޑައެވެ.
ހަވަލާ: ފަސްޓްޕޯސްޓް އަދި ބިޒްނަސް ސްޓޭންޑަރޑް ރިޕޯޓް 2026.