ދުނިޔެއިން ދައުރުވާ ކޮންމެ ދުވަހަކުމެ އެތައް ބައިވަރު ކައިވެނިތަކެއް ރޫޅެމުންދެއެވެ. ގިނަ އަދަދެއްގެ ކައިވެނިތައް ރޫޅެމުން މިދަނީ މައިގަނޑު އެންމެ ސަބަބަކާއި ހުރެއެވެ. އެއީ އެކެއްގެ ނުވަތަ ދެމީހުންގެ ކިބައިގައި އަޚްލާޤު ނެތުމުންނެވެ. ކަން މިހެން ހުރިނަމަވެސް ރިވެތި އަޚްލާޤަށް ދޭންޖެހޭ ސަމާލުކަން މިދަނީ ދުވަހެއް ދުވަހަކަށް ކުޑަވަމުންނެވެ. އެހެންކަމުން އެކަން ބަދަލުކުރަން އެބަޖެހެއެވެ. އަމަލުތައް އިޞްލާޙްކުރަން އެބަޖެހެއެވެ. އުޅުމާއި ގުޅުން ސީދާ ކުރަން އެބަޖެހެއެވެ. ބަސްމަގާއި ބަސްކޮށާރު ތަރުތީބު ކުރަން އެބަޖެހެއެވެ. 

މިކަންކަމާއި ވިސްނާ ފިކުރު ހިންގާލަމާހެވެ! އަހަރެމެންގެ މާތް ނަބިއްޔާ މުޙައްމަދު ﷺ އެންމެ މާތް ސާހިބާ ކަމުގައި ވެގެން ދިއައީ ހަމައެކަނި ކުރެއްވެވި އަޅުކަމަކުން ނޫނެވެ. ބެހެއްޓެވި ރިވެތި އަޚްލާޤީ ސިފަފުޅުތަކުންނެވެ. އެހެން ދީންތަކުގެ މީހުން މިއަދު ފޮތްތައް ލިޔާއިރު ރަސޫލް ﷺ އެންމެ މަތީގައި ދަރަޖަ ކުރަނީ ކީއްވެގެން ހެއްޔެވެ؟ އެކަލޭގެފާނު ކުރެއްވެވި އަޅުކަން ގިނަވެފައި ފުރިހަމަކަމަކުން އެކަންޏެއް ނޫނެވެ. އެކަލޭގެފާނު، ޣައިރު މުސްލިމުންވެސް ހިމެނޭ ގޮތުން މީސްތަކުންނާއިމެދު އަމަލުފުޅު ކުރެއްވެވި ރިވެތި އަޚްލާޤްގެ ސަބަބުންނެވެ. ވީމާ ރިވެތި އަޚްލާޤީ ނަމޫނާ ދެއްކުމަކީ ދުނިޔެއާއި އާޚިރަތުގައިވެސް މީހާގެ ޤަދަރު އުފުލިގެންދާނެ ކަމެކެވެ. 

ދެމަފިރިންގެ ކިބައިގައިވެސް ރިވެތި އަޚްލާޤް ހުރުމާއި ކުރާ ކޮންމެ ކަމެއްގައިވެސް އަޚްލާޤީ ރިވެތި ސިފަތައް ކުރިއަށް ނެރެން އިސްލާމް ދީން ބާރުއަޅައެވެ. ހަމައެކަނި ބާރުއަޅަނީއެއްވެސް ނޫނެވެ. މަޖުބޫރެވެ. އެއީ ﷲ ތަޢާލާގެ އަމުރުފުޅެކެވެ. ރަސޫލް ﷺ ގެ ސުންނަތުގައި އޮތްގޮތެވެ. އަދި އެކަމުގައި ރަސޫލް ﷺ ވަނީ އުންމަތަށް ނަމޫނާ ދައްކަވައިފައެވެ. 

ރިވެތި އަޚްލާޤުން ޒީނަތްތެރިވެފައިވާ ދެމަދަފިރިންގެ ދިރިއުޅުން ސީދާ ވާނެއެވެ. މައްލަަސަ ޖެހުން ކުޑަވުމާއި ޖެހޭ މައްސަލަތައް ޙިކުމަތުގެ ބޭނުން ކޮށްގެން ހައްލު ކުރެވޭނެއެވެ. އާޚިރު ނަތީޖާއަކީ ވަރިއާ ހިސާބަށް ނުގޮސް ކައިވެނީގެ މާތް ގުޅުން ދެމިގެން ދިއުމަށް ބާރަކަށް ވުމެވެ.

ވީމާ މިއީ ކޮންމެ ދެމަފިރިއަކުވެސް ވަރަށް ބޮޑަށް ސަމާލުކަން ދޭންޖެހިފައިވާ ކަމެކެވެ. ހަމައެކަނި ދުނިޔޭގެ ދިރިއުޅުމަށްޓަކައެއް ނޫނެވެ. ތިމާމެންގެ އާޚިރަތަށްޓަކައިވެސްމެއެވެ.