ކަނޑުދަތުރުފަތުރުގެ ދާއިރާގައި ގިނަ ދުވަސްތަކެއް ވަންދެން ޚިދުމަތްކުރެއްވި ތަޖުރިބާކާރު ކެޕްޓަން ޢަބްދުލްޢަޒީޒު މުޙައްމަދު ނިޔާވުމާ ގުޅިގެން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަޢުޒިޔާ ވިދާޅުވެއްޖެއެވެ.
ސޯޝަލް މީޑިއާ މެދުވެރިކޮށް ހިއްސާކުރެއްވި ތަޢުޒިޔާގެ މެސެޖެއްގައި ރައީސް ވަނީ، ފުވައްމުލައް ސިޓީ، ފުނާޑު، ރިޔާޒް (ހުސްނުހީނާގެ)، އަލްމަރުޙޫމް ޢަބްދުލްޢަޒީޒުގެ ޢާއިލާއަށް ހިތާމަ ފާޅުކުރައްވައި، ތަޢުޒިޔާ ދަންނަވާފައެވެ.
ރައީސްގެ މެސެޖުގައި، ޢަބްދުލްޢަޒީޒު މުޙައްމަދަކީ ހުނަރުވެރި، ކުޅަދާނަ އަދި ޚިދުމަތްތެރި ތަޢުލީމީ ޢާއިލާއަކަށް ނިސްބަތްވެވަޑައިގަންނަވާ ބޭފުޅެއްކަން ފާހަގަކުރެއްވިއެވެ. ޚާއްސަކޮށް، 1960ގެ އަހަރުތަކުގައި އައްޑޫ ނޫރާނީ ސްކޫލުގައި އިނގިރޭސި ބަހުގެ ޓީޗަރެއްގެ ގޮތުގައި ގިނަ ދަރިވަރުންތަކަކަށް އުނގަންނައިދެއްވުމާއި، އޭގެ ފަހުން ކަނޑުދަތުރުފަތުރުގެ ދާއިރާގައި 30 އަހަރަށްވުރެ ގިނަ ދުވަހު އެމަނިކުފާނު ކުރެއްވި އަގުހުރި މަސައްކަތްތައް ރައީސް ވަނީ ފާހަގަކުރައްވާފައެވެ.
އޭނާ ކާގޯ ބޯޓުފަހަރުގެ ކެޕްޓަނެއްގެ ގޮތުގައި ދުނިޔޭގެ އެކި ޤައުމުތަކަށް ދަތުރުކުރައްވައި، ދިގު މުއްދަތެއް ވަންދެން ޤައުމަށް ޚިދުމަތްކުރެއްވި ބޭފުޅެއްކަންވެސް ރައީސްގެ މެސެޖުގައި ފާހަގަކުރެއްވިއެވެ.
މި މެސެޖު ނިންމަވާލައްވަމުން ރައީސް ވިދާޅުވީ، ޢަބްދުލްޢަޒީޒު އަވަހާރަވުމަކީ ތަޖުރިބާކާރު، ހަރުދަނާ ޝަޚުޞިއްޔަތެއް ޤައުމަށް ގެއްލިގެންދިޔުން ކަމަށެވެ. އަދި މަރުޙޫމްގެ ފުރާނައަށް ސުވަރުގޭގެ ދާއިމީ ނިޢުމަތް ލެއްވުން އެދި މާތްﷲގެ ހަޟްރަތުގައި ދުޢާ ދަންނަވާފައެވެ.