ކެންސަރުގެ ނުރައްކާތެރި ބައްޔާ ހަނގުރާމަކުރުމަށްފަހު، ނިއުޔޯކަށް ނިސްބަތްވާ އުމުރުން 18 އަހަރުގެ ރަޔަން މާޓީނޯ ހޯދި ކާމިޔާބީއަކީ މިއަދު އެތައް ބަޔަކަށް ލިބިގެންދިޔަ ބޮޑު ހިތްވަރެކެވެ. ގްރޭޑް 8 ނިންމިތަނާހެން "ހޮޖްކިންސް ލިމްފޯމާ" ގެ ދެވަނަ ސްޓޭޖްގެ ކެންސަރަށް ފަރުވާ ހޯދަން ޖެހުމުން ރަޔަންގެ ތައުލީމީ ޙަޔާތަށް ބޮޑު ގޮންޖެހުމެއް ކުރިމަތިވިއެވެ. ނަމަވެސް، ކީމޯތެރަޕީގެ ބުރަ ފަރުވާތައް ނިމުނުތަނާހެން ހިތްވަރާއެކު އޭނާ ހައިސްކޫލްގެ ކިޔެވުން ފެށިއެވެ.
ހައިސްކޫލްގެ ހަތަރު އަހަރު ރަޔަން ނިންމާލީ އާދަޔާޚިލާފު މޮޅު ނަތީޖާއަކާއެކުގައެވެ. އޭނާ ގްރެޖުއޭޓް ވީ ހުރިހާ މާއްދާއަކުން އެންމެ މަތީ މާކްސް ނުވަތަ 4.0 ގެ ޖީޕީއޭ އަކާއެކުގައެވެ. ކިޔެވުމުގެ އިތުރުން ކުޅިވަރުގެ ދާއިރާއިންވެސް އޭނާ ވަނީ ފާހަގަކޮށްލެވޭ ފަދަ ކުރިއެރުންތަކެއް ހޯދާފައެވެ. ވަރުގަދަ އަޒުމަކާއެކު ކުރި މި މަސައްކަތުގެ ނަތީޖާއެއްގެ ގޮތުން، މަތީ ތައުލީމަށް ކިޔެވުމަށްޓަކައި 125،000 އެމެރިކާ ޑޮލަރުގެ އަގުހުރި ސްކޮލަރޝިޕެއްވެސް އޭނާއަށް ވަނީ ލިބިފައެވެ.
ރަޔަންގެ މި ވާހަކައަކީ ބޮޑެތި ބަލިތަކާއި އުނދަގޫތައް ކުރިމަތިވިޔަސް، ހިތްވަރާއި ނުގުޑާ އަޒުމެއް ހުރެއްޖެނަމަ ކާމިޔާބީއާ ހަމައަށް ވާސިލްވެވިދާނެކަމުގެ ދިރިހުރި މިސާލެކެވެ. މިއަދު އޭނާ ތައްޔާރުވަމުންދަނީ ހައިސްކޫލް ނިންމައި، ޔުނިވަރސިޓީގައި އޭނާގެ މުސްތަގުބަލު ބައްޓަންކުރުމުގެ އާ ދަތުރަކަށެވެ. މުޅި ދުނިޔޭގެ ސަމާލުކަން ލިބިފައިވާ މި ޒުވާނާގެ ކާމިޔާބީ ފާހަގަކުރަމުން ގިނަ ބަޔަކު ދަނީ އޭނާއަށް ތައުރީފު ކުރަމުންނެވެ.