މިދިޔަ މޭ މަހު ރާއްޖެއަށް ޒިޔާރަތްކުރި ޓޫރިސްޓުންގެ އަދަދު 3 ޕަސަންޓު އިތުރުވެއްޖެކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ. މިދިޔަ އަހަރުގެ މޭ މަހާ އަޅާބަލާއިރު މިއީ ކުރިއެރުމެކެވެ. ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން، މޭ މަހު ރާއްޖެއަށް ޖުމްލަ 139،746 ޓޫރިސްޓުން ޒިޔާރަތްކޮށްފައިވެއެވެ. މިދިޔަ އަހަރުގެ މޭ މަހު ރާއްޖެ ޒިޔާރަތްކޮށްފައިވަނީ 135،614 ޓޫރިސްޓުންނެވެ.
މޭ މަހު ޓޫރިސްޓުންގެ އަދަދު އިތުރުވިނަމަވެސް، މިއަހަރުގެ ފުރަތަމަ ފަސް މަހުގެ ޖުމްލަ އަދަދުތަކަށް ބަލާއިރު މިދިޔަ އަހަރަށްވުރެ ވަނީ ދަށްވެފައެވެ. މިދިޔަ އަހަރުގެ ފުރަތަމަ ފަސް މަހު 966،358 ޓޫރިސްޓުން ރާއްޖެއަށް ޒިޔާރަތްކުރިއިރު، މިއަހަރުގެ ފުރަތަމަ ފަސް މަހު ރާއްޖެ އައިސްފައިވަނީ 921،115 ޓޫރިސްޓުންނެވެ. މިއީ 4.7 ޕަސަންޓުގެ ދަށްވުމެކެވެ.
ޓޫރިޒަމް މިނިސްޓްރީން ބުނީ، އަހަރުގެ ކުރީކޮޅު ޓޫރިސްޓުންގެ އަދަދު ދަށްވީ މެދުއިރުމަތީގެ ހަނގުރާމައާ ގުޅިގެން ފްލައިޓްތަކުގެ ދަތުރުތައް މެދުކެނޑުމާއި ގުޅިގެން ކަމަށެވެ. އެގޮތުން މާރިޗު އަދި އެޕްރީލް މަހު ޓޫރިސްޓުންގެ އަދަދު ވަނީ ނިސްބަތުން ބޮޑުތަނުން ދަށްވެފައެވެ. މި ހީނަރުކަން ރަނގަޅުކުރުމަށްޓަކައި އެހެން މަންޒިލްތަކުން ޓޫރިސްޓުން ގެނައުމަށް ސަރުކާރުން މިހާރު ދަނީ މަސައްކަތްކުރަމުންނެވެ.
ޓޫރިސްޓުންގެ އަދަދުތައް ދަށްވިނަމަވެސް ރާއްޖޭގެ ޓޫރިޒަމްގެ މައިގަނޑު މާކެޓުތަކުން ގިނަ އަދަދަކަށް ޓޫރިސްޓުން ދަނީ ޒިޔާރަތްކުރަމުންނެވެ. އެގޮތުން މިހާތަނަށް ޗައިނާއިން 143,917 ޓޫރިސްޓުން، ރަޝިއާއިން 125,096 ޓޫރިސްޓުން އަދި އިނގިރޭސިވިލާތުން 80،323 ޓޫރިސްޓުން ރާއްޖެއަށް ޒިޔާރަތްކޮށްފައިވެއެވެ. މި އަހަރަށް ކަނޑައަޅާފައިވާ އަމާޒުތައް އިތުރަށް ބެލުމަށްފަހު ރިވިއު ކުރާނެ ކަމަށް ޓޫރިޒަމް މިނިސްޓްރީން ބުނެއެވެ.