އެމެރިކާ ބައްރުގައި ކުރިއަށްދާ 2026 ވަނަ އަހަރުގެ ފީފާ ވޯލްޑްކަޕްގައި ނަސްލީ ތަފާތުކުރުމާ ދެކޮޅަށް ފީފާއިން ވަނީ މިހާތަނަށް ފެނުނު އެންމެ ހަރުކަށި ފިޔަވަޅުތައް ތައާރަފުކޮށްފަ އެވެ. މި ގަވާއިދުތަކުގެ ތެރޭގައި އެންމެ ފާހަގަކޮށްލެވޭ އެއް ކަމަކީ "ވިނީޝިއަސް ލޯ" ތައާރަފުކުރުމެވެ. މި ގަވާއިދުގެ ދަށުން، މެޗެއްގެ ތެރޭގައި ވާދަވެރި ކުޅުންތެރިއަކާ ދިމާކުރާއިރު އަމިއްލަ އަނގަ ނިވާކުރާ ކުޅުންތެރިންނަށް ސީދާ ރަތް ކާޑު ދީ ދަނޑުން ފޮނުވާލެވޭނެ އެވެ.
މީގެ އިތުރުން، ނަސްލީ ތަފާތުކުރުމުގެ އަމަލުތައް ހުއްޓުވަން "އެކްސް" (X) ޖެސްޗާ ޕްރޮޓޮކޯލް ވެސް ވަނީ މުބާރާތުގައި ބޭނުންކުރަން ފަށާފަ އެވެ. އެގޮތުން، ކުޅުންތެރިއަކަށް ނަސްލީ ތަފާތުކުރުމުގެ އަމަލެއް ކުރިމަތިވެއްޖެނަމަ، ދެ އަތް ހުރަސްކޮށް "އެކްސް" ޖެސްޗާ ދެއްކުމުން މެޗު ވަގުތުން މެދުކަނޑާލާނެ އެވެ. މި ގަވާއިދުގެ ތިން މަރުހަލާގެ ޕްރޮޓޮކޯލްގެ ދަށުން، މައްސަލަ ހައްލު ނުވެއްޖެނަމަ މެޗު މުޅިން މެދުކަނޑާލުމުގެ ބާރު ރެފްރީންނަށް ލިބިގެންވެ އެވެ.
ފީފާގެ ރައީސް ޖިއާނީ އިންފަންޓީނޯ ވިދާޅުވި ގޮތުގައި، މި ފިޔަވަޅުތަކަކީ ފުޓްބޯޅައިގެ ތެރެއިން ނަސްލީ ތަފާތުކުރުން މުޅިން ނައްތާލުމަށް އެޅުނު މުހިންމު ފިޔަވަޅެކެވެ. "ލިސަން، ސްޓޭންޑް އަޕް، ޝޯ އަޕް" ގެ ނަމުގައި ކުރިއަށްގެންދާ މި ކެމްޕޭނާއެކު، ފީފާއިން އަމާޒު ހިފާފައިވަނީ ފުޓްބޯޅަ އާއި މުޖުތަމައުގައި ނަސްލީ ތަފާތުކުރުމަށް އެއްވެސް ޖާގައެއް ނުދިނުމަށެވެ.