ޕާކިސްތާންގައި މީހުންތަކެއް އަރުވައިގެން ދަތުރުކުރި ބަހެއް، ކޮންޓެއިނަރުތަކެއް އަރުވައިގެން ދަތުރުކުރި ޓްރަކެއްގައި ޖެހި އެކްސިޑެންޓެއް ވެއްޖެއެވެ. މިހާދިސާގައި 33 މީހަކުވަނީ މަރުވެފައެވެ.
ރިޕޯޓްތައް ބުނާގޮތުގައި، މި އެކްސިޑެންޓް ހިނގާފައި ވަނީ ޕާކިސްތާންގެ އެންމެ ބާރުބޮޑު އެއް ހައިވޭގައެވެ. އެ ބަހުގައި ގިނައިން ތިބީ އީދު ފާހަގަކުރުމަށް އެމީހުންގެ ގެތަކަށް ދިއުމަށް ދަތުރު ކުރަމުންދިޔަ މީހުންނެވެ.
މި ހާދިސާގައި 33 މީހަކު މަރުވެފައިވާއިރު، އިތުރު 40 މީހަކަށް ވަނީ އެކިވަރުގެ އަނިޔާތައް ލިބިފައެވެ.
ރިޕޯޓްތައް ބުނާގޮތުގައި، އެ ބަސް ދަތުރު ފެށީ ސިއަލްކޮޓް ސިޓީއިންނެވެ. އަދި ދަތުރުކުރަމުން ގޮސްފައި ވަނީ ޓައުންސާ މަގުމަތިން ކަމަށާއި، އެ ބަހުގެ މަންޒިލަކީ ޕަންޖާބްގެ ޑެރާ ޣާޒީޚާން ސިޓީ ކަމަށެވެ.
މި އެކްސިޑެންޓް ހިނގަން މެދުވެރިވި ސީދާ ސަބަބު އަދި ކަށަވަރުނުވާއިރު، މިހާދިސާ ދަނީ އިތުރަށް ތަހުގީގު ކުރަމުންނެވެ.
މި ހާދިސާގައި ޒަހަމްވި މީހުން ވަނީ އެސަރަހައްދާ ކައިރީގައި ހުރި ހޮސްޕިޓަލަކަށް ގެންގޮސްފައެވެ. އެެ ސަަރަހައްދުގައި ރެސްކިއުޓީމްގައި އިސްކޮށް ހަރަކާތްތެރިވި ޝެރް ޚާން ވިދާޅުވީ، އެ އެކްސިޑެންޓްގައި އަނިޔާވި ބައެއް މީހުންގެ ހާލަތު ސީރިއަސް ކަމަށެވެ.
ޕާކިސްތާނަކީ އާންމުކޮށް މަގުމަތީގެ ބޮޑެތި ހާދިސާތައް ހިނގާ ގައުމެކެވެ. މިގޮތަށް ވަނީ މަގުގެ ފެންވަރު ދަށްކަމުން ކަމަށް ގިނަބަޔަކު ބުނެއެވެ.