ފޯނާ ޓެބާ ހުޅުވާލަނީ، ހުސްވީ މައޭ ކަންތަށް މިތާ

            ރޯނާ ވެގެން ދިޔަކަސް ދެލޯ، ހުއްޓާ ނުލާ ބަލަމުންދެއޭ

ބަލަނީ އެއިން ކޫސަނި ފޮޓޯ، ހީހީ ބަނޑަށް ގޮށްވެސް އަރާ

            މަލަރޭ ދެކޯތާ ފަތް ވަނީ، ހީހީ މަޖާ ނަގަމުންދެއޭ

ފެނުމުން އެއިން ފޮޓޮއެއް ލޮލަށް، ލައިކެއް ދެއޭ ވިސްނާ ނުލާ

          ފެނުމުން އެއިން ލިއުމެއް ލޮލަށް، ވިސްނާ ނުލާ ކަހަމުންދެއޭ

މަލަމެއް އަޅާ ސިކުނޑީ މަތީ، ވިސްނުން އެކީ ހަނިކޮށް ފިއޭ

           ބަލައެއް ނުލާ ވިސްނާ ނުލާ، ޞަފްޙާ ތަކެއް އުކަމުންދެއޭ

ޣާފިލް ކަމާ އެކުގާ ކުރާ، މާ "މޮޅު" ކަމެއް ކަމުގާ ވިއޭ

           ޣާފިލް ނިދީގައި ނިދުމަކީ، މަޖަލެއް ކަމަށް ހަދަމުންދެއޭ

ޢިލްމެއް އެއިން ލިބިދާނެތީ، ބިރުގަންނަ ހެންވެސް ހީވެއޭ

           ޙިލްމެއް އެއިން ދަސްކޮށްލުމީ، ވޭނެއް ކަމަށް ދެކެމުން ދެއޭ

ހޯދޭނެ މަންފާ އެކަމުގާ، ވިސްނާ ތިބިއްޔާ އަބަދުގާ

          ފޯދޭނެހެން ރުއްގަސް އެވާ، ހިތްތަށް އެކީ އަލި ކޮށްދެއޭ