މިޒަމާނުގެ އިންސާނާގެ ދިރިއުޅުމުގެ ވައްޓަފާޅި ހުރިގޮތުން، އަޅުގަނޑުމެންގެ ތެރެއިން ގިނަ މީހުންނަކީ ދުވާލުގެ ބޮޑުބައި އިމާރާތްތަކުގެ އެތެރޭގައި ނުވަތަ ބަންދު މާހައުލެއްގައި ހޭދަކުރާ ބަޔެކެވެ. އޮފީސްތަކާއި، ގޭގެއާއި، ކިޔަވައިދޭ މާހައުލުތައް ފަރުމާކުރެވިފައިވަނީ އިންސާނާ ބޭރަށް ނުކުމެ އުޅުން މަދުވާނެ ފަދަ ގޮތަކަށެވެ. ނަމަވެސް، ސައިންޓިފިކް ހެކިތަކުން ދައްކާގޮތުގައި އިންސާނާގެ ހަށިގަނޑަކީ މިފަދަ ބަންދު ދިރިއުޅުމަކަށް ހެދިފައިވާ ހަށިގަނޑެއް ނޫނެވެ.
އިންސާނުންގެ ތާރީޚުގެ ތެރެއިން ވޭތުވެދިޔަ 300،000 (ތިންލައްކަ) އަހަރު އަޅުގަނޑުމެން ދިރިއުޅެފައިވަނީ ޝިކާރަކުރުމާއި ގުދުރަތީ މާހައުލުން ކާނާ ހޯދައިގެން އުޅުނު ބައެއްގެ ގޮތުގައެވެ. އެ ޒަމާނުގައި އިންސާނުން ނިދައި އުޅުނީ އަލިފާންގަނޑުތަކުގެ ކައިރީގައެވެ. އަދި ހޭލައި އުޅުނީ އިރުގެ އަލިކަމާ އެކުގައެވެ. އެހެންކަމުން، އިންސާނާގެ ހަށިގަނޑު އުފެދި، ބަދަލުވަމުން އައީ ގުދުރަތީ މާހައުލާ ގުޅިލާމެހިގެންވާ ގޮތަކަށެވެ.
ނަމަވެސް، މިއަދުގެ ހާލަތަށް ބަލާއިރު އިންސާނާގެ ހަށިގަނޑުގެ އޭރުގެ އުފެދުމާއި މިހާރުގެ ދިރިއުޅުމާ ދެމެދު ބޮޑު ފަރަގެއް އެބައޮތެވެ. އަޅުގަނޑުމެންގެ ހަށިގަނޑުގެ އިވޮލިއުޝަން ނުވަތަ ތަރައްގީވުން ހުރީ ހަތަރު ފާރުގެ އެތެރޭގައި، ބަންދުވެގެން ދިރިއުޅޭކަށް ނޫނެވެ. މި ބަދަލުގެ ނޭދެވޭ އަސަރުތައް މިއަދު އަޅުގަނޑުމެންގެ ހަށިގަނޑުންނާއި ސިއްހަތުން ވަރަށް ސާފުކޮށް ފެންނަމުންދާ ކަމަށް ސައިންސްވެރިން ފާހަގަކުރެއެވެ.
ގޭތެރޭގައާއި ބަންދު މާހައުލުގައި ގިނަވަގުތު ހޭދަކުރުމުން ހަށިގަނޑުގެ ސްޓްރެސް ހޯރމޯން އެއް ކަމަށްވާ 'ކޯޓިސޯލް' މަތިވެގެންދެއެވެ. މީގެ އިތުރުން ލޭގެ ޕްރެޝަރު މަތިވުމާއި، ސަމާލުކަންދިނުމުގެ ބާރު ދަށްވުމަކީ ބަންދު މާހައުލެއްގައި އުޅުމުން ދިމާވާ މައިގަނޑު މައްސަލަތަކެވެ. ހަމައެއާއެކު، އިރުގެ އަލި ނުލިބުމުގެ ސަބަބުން ހަށިގަނޑުގެ ދިފާއީ ނިޒާމު ބަލިކަށިވުމަށްވެސް މިއީ މަގުފަހިވާ ކަމެކެވެ.
މިކަމަށް އޮތް އެންމެ ފުރިހަމަ ހައްލަކީ ގުދުރަތީ މާހައުލުގައި ވަގުތު ހޭދަކުރުމެވެ. ގުދުރަތީ މާހައުލުގައި ވަގުތު ހޭދަކުރުމުން، ހަށިގަނޑުގައި ހުންނަ ކޯޓިސޯލްގެ މިންވަރު ދަށްކޮށްދޭކަން ސައިންޓިފިކް ދިރާސާތަކުން ވަނީ ސާބިތުވެފައެވެ. މިއީ އިންސާނާގެ ނާރުތަކުގެ ނިޒާމަށް ހަމަޖެހުން ގެނެސްދީ، ނުތަނަވަސްކަމާއި ހާސްކަން މުޅިން ދުރުކޮށްދޭ ކަމެކެވެ.
މީގެ އިތުރުން، ގަސްގަހާގެއްސާއި ހާމަ މާހައުލެއްގައި އުޅުމަކީ ލޭގެ ޕްރެޝަރު ދަށްކޮށްދޭ ކަމެކެވެ. ގުދުރަތީ މާހައުލުން ލިބޭ ތާޒާ ވައިގެ ސަބަބުން ހިތުގެ ހިންގުން ރަނގަޅުކޮށްދީ، ހަށިގަނޑުގެ ލޭގެ ދައުރުވުން އެއްވަރެއްގައި ހިފަހައްޓައިދެއެވެ. އެހެންކަމުން، މިއީ ހިތުގެ ބަލިތަކުން ސަލާމަތްވުމަށްޓަކައި ކޮންމެހެންވެސް ބޭނުންތެރި ކަމެކެވެ.
ހަމައެއާއެކު، ގުދުރަތީ މާހައުލުގައި ވަގުތު ހޭދަކުރުމަކީ އިންސާނާގެ ވިސްނުމާއި ސަމާލުކަންދިނުމުގެ ބާރު އިއާދަކޮށްދޭ ކަމެކެވެ. އަދި ހަށިގަނޑުގެ ބަލިތަކުން ދިފާއުވުމުގެ ބާރު ނުވަތަ އިމިއުނިޓީ ވަރަށް ބޮޑަށް މަތިކޮށްދެއެވެ. ގަސްގަހާގެހިން ދޫކުރާ ބައެއް ކަހަލަ އޯގަނިކް މާއްދާތަކުގެ ސަބަބުން، އިންސާނާގެ ހަށިގަނޑުގެ ދިފާއީ ސެލްތައް އިތުރަށް ހަރަކާތްތެރިވެ، ބަލިތަކާ ހަނގުރާމަކުރުމުގެ ގާބިލުކަން އިތުރުވެގެންދެއެވެ.
ނިންމާލަމުން ދަންނަވާނީ، އަޅުގަނޑުމެންގެ ބުރަ މަސައްކަތްތަކުން ކުޑަ ވަގުތުކޮޅެއް ހުސްކޮށްލުމަށްފަހު، ހަފުތާއަކު އެއްފަހަރު ނަމަވެސް ގުދުރަތީ މާހައުލަށް ނުކުމެ އުޅުމަކީ ސިއްހަތަށްޓަކައި ކޮންމެހެން ކުރަންޖެހޭ ކަމެކެވެ. އޮފީސްތަކުގެ ބަންދު މާހައުލުން ބޭރަށް ނުކުމެ، ގަސްތަކާއި، ގޮނޑުދޮށްތަކާއި، ހާމަ މައިދާންތަކުގައި ވަގުތު ހޭދަކުރުމަކީ ދުޅަހެޔޮ އަދި ދިގު އުމުރެއްގެ ސިއްރެވެ.
ހަވާލާ:
ސޭޕިއަންޝިޕް ލެބް: ސައިންޓިފިކް ރިޕޯޓް އަދި މެޑިކަލް ރިސާޗް ނޯޓްސް.