މާލެ ސަރަހައްދުގެ ސްކޫލެއްގައި ކުރިން ވަޒީފާ އަދާކުރި ބިދޭސީއެއްގެ ނަމުގައި ފަސް އަހަރު ވަންދެން މުސާރަ ނަގައި، 1.5 މިލިއަން ރުފިޔާގެ ބޮޑު ހިޔާނާތެއް ހިންގި މައްސަލައަކާ ގުޅިގެން އެ ސްކޫލުގެ އިސް ތިން މުވައްޒަފަކު ވަޒީފާއިން ވަކިކުރަން ސިވިލް ސާވިސް ކޮމިޝަނުން ނިންމައިފިއެވެ.
މި މައްސަލައާ ގުޅިގެން ވަޒީފާއިން ވަކިކުރަން ނިންމާފައި ވަނީ އެ ސްކޫލުގެ އެޑްމިނިސްޓްރޭޓަރާއި، ހިއުމަން ރިސޯސް މެނޭޖަރުގެ އިތުރުން ބަޖެޓް އޮފިސަރެވެ. ސިވިލް ސާވިސް ކޮމިޝަންގެ ނައިބު ރައީސް މުހައްމަދު ނާސިހު ވެސް ވަނީ މިފަދަ މައްސަލައެއް ފާހަގަވެ، އެ ތިން މުވައްޒަފުން ވަކިކުރަން ނިންމާފައިވާކަން ކަށަވަރުކޮށްދެއްވާފައެވެ.
މައުލޫމާތު ލިބިފައިވާ ގޮތުގައި، 2021 ވަނަ އަހަރުން ފެށިގެން ހިންގަމުން އައި މި ހިޔާނާތުގައި، އެ ބިދޭސީ މީހާ ވަޒީފާ ދޫކޮށް ރާއްޖެއިން ދިޔުމުން އޭނާގެ ބަދަލުގައި އެހެން ނަމެއް މުސާރަ ޝީޓަށް ވަނީ އިތުރުކޮށްފައެވެ. އަދި އެ ފައިސާ ޖަމާކުރަމުން ދިޔައީ ބަޖެޓް އޮފިސަރާ އާއިލީ ގޮތުން ގުޅުންހުރި އެކި މީހުންގެ ބޭންކް އެކައުންޓުތަކަށެވެ. މީގެ ސަބަބުން ދައުލަތުގެ ބަޖެޓުން ބޮޑު އަދަދެއް ވަނީ ގެއްލިފައެވެ.
މި ބޮޑު މައްސަލަ ފަޅާއެރީ އެޑިއުކޭޝަން މިނިސްޓްރީން ސްކޫލުތަކުގެ ރެންޑަމް އޮޑިޓްތަކެއް ކުރަމުން ދަނިކޮށެވެ. މިއީ ފަހުގެ ތާރީހެއްގައި ސްކޫލެއްގެ އިދާރީ މުވައްޒަފުންތަކެއް ގުޅިގެން ހިންގި އެންމެ ބޮޑު އެއް ހިޔާނާތް ކަމަށް ވާއިރު، އެންޓި ކޮރަޕްޝަން ކޮމިޝަން (އޭސީސީ) އިން މިހާރު ވަނީ މި މައްސަލަ ރަސްމީކޮށް ތަހުގީގު ކުރަން ފަށާފައެވެ.