އަނިޔާގެ ސަބަބުން، ފީފާ ވޯލްޑް ކަޕްގައި ބްރެޒިލް ކުޅޭ ދެވަނަ މެޗުގައި ހެއިޓީއާ ދެކޮޅަށް ނޭމާ ނުކުޅޭނެކަން ބްރެޒިލްގެ ފުޓްބޯޅަ ފެޑެރޭޝަނުން ކަށަވަރުކޮށްދީފި އެވެ. އުމުރުން 34 އަހަރުގެ ފޯވާޑަށް އަނިޔާވީ މިދިޔަ މޭ މަހުގެ މެދުތެރޭގައި ސަންތޯސްއަށް ކުޅެމުންނެވެ. އޭނާގެ ފައިގެ މަސްގަނޑަށް ލިބުނު އަނިޔާއިން ސަލާމަތްވުމަށް އަދިވެސް ދަނީ ފަރުވާ ހޯދަމުންނެވެ. އެހެންކަމުން މިރޭ ފިލަޑެލްފިއާގައި ކުޅޭ މި މެޗަށް އޭނާ ޓީމާއެކު ދަތުރެއް ނުކުރާނެ އެވެ.
ބްރެޒިލްގެ ފުޓްބޯޅަ ފެޑެރޭޝަނުން ބުނި ގޮތުގައި، ނޭމާ މަޑުކުރާނީ ނިއު ޖާޒީގަ އެވެ. އޭނާ އެތަނުގައި ހުރެގެން ރިހެބިލިޓޭޝަންގެ ފަހު މަރުހަލާތައް ފުރިހަމަކުރަމުންދާއިރު، މިއީ އޭނާއަށް މި ފަހަރުގެ ވޯލްޑް ކަޕްގައި ގެއްލޭ ޖެހިޖެހިގެން ދެވަނަ މެޗެވެ. ބްރެޒިލުން ކުޅުނު ފުރަތަމަ މެޗުގައި މޮރޮކޯއާ ވާދަކޮށް 1-1 އިން އެއްވަރުވިއިރު ވެސް ނޭމާ ކުޅެފައެއް ނުވެ އެވެ. އެ މެޗުން ބްރެޒިލް ސަލާމަތްވީ ވިނީޝިއަސް ޖޫނިއާ ޖަހައިދިން ގޯލުންނެވެ.
ނޭމާ މިހާރު ޓީމާއެކު ފަރިތަކުރުންތަކުގައި ބައިވެރިވާން ފަށާފައިވީ ނަމަވެސް، ކޯޗު ކާލޯ އެންޗެލޮޓީ އާއި މެޑިކަލް ޓީމުން ބޭނުންވަނީ އަވަސް އަރުވާނުލައި އޭނާ ރަނގަޅަށް ފިޓްކުރާށެވެ. ބްރެޒިލްގެ މައިގަނޑު އަމާޒަކީ މުބާރާތުގެ ދެވަނަ ބުރުގެ މެޗުތަކަށް ނޭމާ މުޅިން ފިޓްކޮށް ހުރުމެވެ. ނޭމާ ނެތްތަން ފޫބެއްދުމަށް ބްރެޒިލުން މި މެޗުގައި ބޭނުންކުރާނީ ޒުވާން ކުޅުންތެރިން ކަމަށްވާ ވިނީޝިއަސް އާއި އެންޑްރިކް ފަދަ ކުޅުންތެރިންނެވެ. ބްރެޒިލްގެ ގްރޫޕް ސްޓޭޖުގެ ފަހު މެޗުގައި މި މަހުގެ 25 ވަނަ ދުވަހު ނުކުންނާނީ ސްކޮޓްލޭންޑާ ދެކޮޅަށެވެ.