ފީފާ ވޯލްޑް ކަޕް 2026 ގެ ގްރޫޕް އީގައި އެމެރިކާގެ ކެންސަސް ސިޓީ ސްޓޭޑިއަމްގައި މި މަހުގެ 20 ވަނަ ދުވަހު އެކުއެޑޯއާ ދެކޮޅަށް ކުޅުނު މެޗުގައި، ކިއުރަސާއޯގެ ކީޕަރު އެލޯއި ރޫމް 15 ސޭވް ހަދައި، ވޯލްޑް ކަޕް ތާރީހުގައި 90 މިނެޓު ތެރޭގައި އެންމެ ގިނަ ސޭވް ހެދި ކީޕަރުގެ ރެކޯޑް ހޯދައިފިއެވެ.
އުމުރުން 37 އަހަރުގެ ރޫމް ދެއްކި މޮޅު ކުޅުމާއެކު މި މެޗު 0-0 އިން އެއްވަރުވެ، މިއީ ވޯލްޑް ކަޕްގެ ތާރީހުގައި ކިއުރަސާއޯއިން ހޯދި ފުރަތަމަ ޕޮއިންޓެވެ. މީގެ ކުރިން ވޯލްޑް ކަޕްގައި އެންމެ ގިނަ ސޭވް ހެދުމުގެ ރެކޯޑް އޮތީ 2014 ވަނަ އަހަރު ބެލްޖިއަމާ ދެކޮޅަށް ކުޅުނު މެޗުގައި 16 ސޭވް ހެދި އެމެރިކާގެ ކީޕަރު ޓިމް ހޮވާޑް އަތުގައެވެ. ނަމަވެސް އެއީ އިތުރު ވަގުތު ކުޅެގެން ހޯދި ރެކޯޑެކެވެ.
މިއީ އޭނާގެ ހަޔާތުގައި ކުޅުނު އެންމެ މޮޅު މެޗުކަން ފާހަގަކުރަމުން ރޫމް ބުންޏެވެ. އޭނާ ބުނިގޮތުގައި މިއީ މީގެ 11 އަހަރު ކުރިން 2015 ވަނަ އަހަރު ކިއުރަސާއޯއިން ވޯލްޑް ކަޕަށް ކޮލިފައިވުމަށް ފެށި މަސައްކަތުގެ ހަގީގީ ހުވަފެނެވެ. ކުރީގެ ކޯޗު ޕެޓްރިކް ކްލައިވަޓް އިސްވެ ފެށި މި މަސައްކަތުގައި ރޫމް ބައިވެރިވީ ވަރަށް ބޮޑު އުންމީދަކާއެކުގައެވެ. ރޫމް ބުނިގޮތުގައި، ޖަރުމަނާ ދެކޮޅަށް ކުޅުނު މެޗުގައި ގިނަ ގޯލުތަކެއް ވަދެފައިވީ ނަމަވެސް، މި މެޗުގައި މުޅި ދުނިޔެއަށް އެމީހުންގެ ހަގީގީ ކުޅުން ދައްކާލެވިއްޖެއެވެ.
މެޗަށްފަހު ކިއުރަސާއޯގެ ކެޕްޓަން ލިއަންޑްރޯ ބަކޫނާ އާއި އެކުއެޑޯގެ ކީޕަރުވެސް ވަނީ ރޫމްގެ ކުޅުމަށް ވަރަށް ބޮޑަށް ތައުރީފްކޮށްފައެވެ. އެކުއެޑޯގެ ކީޕަރު ބުނިގޮތުގައި، ރޫމް ކުޅުނީ އޭނާގެ ހަޔާތުގައިވެސް ކުޅުނު އެންމެ މޮޅު މެޗެވެ. މެޗު ނިމުމުން ރޫމް ވަނީ އޭނާގެ ކާމިޔާބީ، ގައުމީ ޓީމުގެ ދަތުރެއްގައި ނިޔާވި ކީޕަރު ޖަރުޒީނިއޯ ޕިއެޓާއަށް ހަދިޔާކޮށްފައެވެ. ކިއުރަސާއޯއިން ހޯދި މި ތާރީހީ ކާމިޔާބީއާއެކު ރޫމްގެ ނަން ވަނީ ދުނިޔޭގެ ފުޓްބޯޅަ ތާރީހުގައި ރަން އަކުރުން ފަވާލެވިފައެވެ.