2030 ވަނަ އަހަރު ބޭއްވުމަށް ހަމަޖެހިފައިވާ ފީފާ ވޯލްޑް ކަޕަށް ތައްޔާރުވުމުގެ ގޮތުން، ދުނިޔޭގެ އެންމެ ބޮޑު ފުޓްބޯޅަ ސްޓޭޑިއަމް ބިނާކުރުމުގެ މަސައްކަތް މޮރޮކޯއިން ފަށައިފިއެވެ. "ގްރޭންޑް ސްޓޭޑް ހަސަން 2" ގެ ނަމުން ނަންދީފައިވާ މި ބޮޑު ސްޓޭޑިއަމަކީ 115،000 މީހުންގެ ޖާގައާ އެކު ދުނިޔޭގެ އެންމެ ބޮޑު ފުޓްބޯޅަ ދަނޑަށް ވެގެންދާނެއެވެ.
މޮރޮކޯގެ ކަސަބްލާންކާ ކައިރީގައި ތަރައްގީކުރާ މި ސްޓޭޑިއަމްގެ މަސައްކަތް މުޅިން ނިންމާލުމަށް އަމާޒު ހިފާފައިވަނީ 2028 ވަނަ އަހަރަށެވެ. މި މަޝްރޫއަކީ ފުޓްބޯޅައިގެ އެންމެ ބޮޑެތި މެޗުތައް އެ ގައުމުގައި ބޭއްވުމަށާއި، ކުޅިވަރުގެ ދުނިޔޭގައި ފާހަގަކޮށްލެވޭ ފަދަ ހާއްސަ ބިނާއެއް އުފެއްދުމަށް މޮރޮކޯއިން ކުރިއަށްގެންދާ މުހިންމު މަސައްކަތެކެވެ.
މި ސްޓޭޑިއަމް ފަރުމާކޮށްފައިވަނީ މޮރޮކޯގެ ސަގާފީ ފެސްޓިވަލްތަކުގައި ބޭނުންކުރާ ފޭލިގެތަކުން ހިޔާލު ހޯދައިގެންނެވެ. ހިތްގައިމު ފުރާޅެއްގެ ބައްޓަމަށް ހަދާ މި ބިނާގެ ވަށައިގެން ރީތި ބަގީޗާތަކެއް ހެދުމަށް ހަމަޖެހިފައިވާއިރު، މިއީ ސަޕޯޓަރުންނަށް އާ ތަޖުރިބާތަކެއް ލިބޭނެ ގޮތަށް ޒަމާނީ ފެންވަރަށް ތައްޔާރުކުރާ ތަނެކެވެ.