އިނގިރޭސިވިލާތުގެ ރަސްގެފާނު ޗާލްސް 3 ވަނަ، އެމަނިކުފާނުގެ އަމިއްލަފުޅު ޓެކްސް ބިލުތަކުގެ މައުލޫމާތު އާންމުކުރައްވަން ނިންމަވައިފިއެވެ. ބަކިންގްހަމް ޕެލަސްއިން އޭއެފްޕީއަށް މައުލޫމާތު ދެމުން ބުނީ، ޝާހީ އާއިލާގެ މާލީ ކަންކަމާ މެދު އާންމުންގެ ފާޑުކިޔުންތައް އިތުރުވަމުންދާތީ، ހާމަކަން ބޮޑުކުރުމުގެ ގޮތުން މި ނިންމުން ނިންމަވާފައިވާ ކަމަށެވެ. މިއީ އިނގިރޭސި ރަސްކަލަކު އެމަނިކުފާނުގެ އަމިއްލަ ޓެކްސްގެ މައުލޫމާތު އާންމުކުރައްވާ ފުރަތަމަ ފަހަރެވެ.
އާންމު އުސޫލުން އިނގިރޭސި ރަސްކަލުންނަށް ވަކި ބާވަތްތަކުގެ ޓެކްސް ދެއްކުމުން އިސްތިސްނާ ލިބެއެވެ. ނަމަވެސް، ޝާހީ އާއިލާއިން އަމިއްލައަށް އިސްނަގައިގެން ބައެއް ޓެކްސްތައް ދައްކަމުން އަންނަތާ އެތައް އަހަރެއް ވެއްޖެއެވެ. ކުރިން ޓެކްސް ބިލުތައް ހާމަކުރުމުގެ އެއްވެސް ޒިންމާއެއް ރަސްކަލުންނަށް ނެތް ނަމަވެސް، ކުރީގެ ޕްރިންސް އެންޑްރޫ މައުންޓްބެޓެން-ވިންޑްސަރގެ މައްސަލަތަކުގެ ސަބަބުން، ޝާހީ އާއިލާގެ މާލީ ހާލަތު އާންމުންގެ ފާޑުކިޔުމުގެ ތެރެއަށް ވަނީ ވަދެފައެވެ.
ރަސްގެފާނު ޗާލްސް ވަނީ ވަލީއަހުދުގެ މަގާމުގައި ހުންނެވި އިރުއްސުރެ އަމިއްލަފުޅު ޓެކްސްގެ މައުލޫމާތު ހާމަކުރައްވަން ފައްޓަވާފައެވެ. މިހާރު ރަސްކަމުގެ ތަހުތުގައި ހުންނެވިއިރު، މިފަދަ މައުލޫމާތު އާންމުކުރައްވާ ފުރަތަމަ ރަސްކަލަކަށް އެމަނިކުފާނު ވެވަޑައިގަންނަވާނެއެވެ. މިއީ ޝާހީ މާލީ ކަންކަމުގެ ހާމަކަން އިތުރުކުރުމަށް އެމަނިކުފާނު އަޅުއްވާ މުހިންމު ފިޔަވަޅެއްގެ ގޮތުގައި ގިނަ ބަޔަކު ދެކެއެވެ.