ސްކޫލް ދަރިވަރުންނަށް އަމިއްލަ ސާފުތާހިރުކަން ދަސްކޮށްދިނުމުގެ ގޮތުން، ކްލާހެއްގައި މުދައްރިސަކު ދިން ފިލާވަޅެއް ގިނަ ބައެއްގެ ސަމާލުކަމަށް އަތުވެއްޖެއެވެ. މުދައްރިސް ވަނީ ދަރިވަރުންގެ ނިޔަފަތިތައް އިންސްޕެކްޓްކޮށް، ސާފުތާހިރުކަމާއި ދުޅަހެޔޮ ސިއްހަތުގެ ގުޅުމާ ބެހޭގޮތުން ވަރަށް ބާރުގަދަ ފިލާވަޅެއް ނަގައިދީފައެވެ.
އިންޑިޔާގެ ސުކޫލެއްގައި ކުރިއަށް ދިޔަ މި ހަރަކާތުގެ ތެރޭގައި، ނިޔަފަތި ދިގުކޮށް ހުރުމުން ނުވަތަ ނިޔަފަތިތައް ނުސާފުކޮށް ހުރުމުން އޭގެ ދަށުގައި ޖަރާސީމާއި ކިލަނބުކަން ފަސޭހައިން އުފެދޭކަން މުދައްރިސް ދަރިވަރުންނަށް އޮޅުންފިލުވައިދިނެވެ. މިގޮތަށް ހުންނަ ކިލަނބުކަމުގެ ސަބަބުން ކާބޯތަކެއްޗަށާއި، ފޮތްތަކަށާއި، މޭޒުތައް ފަދަ ގިނަ މީހުން އަތްލާ ތަކެއްޗަށް ޖަރާސީމު ފެތުރި، ބަލިތައް ޖެހުމުގެ ފުރުސަތު ބޮޑުކަން ވަނީ ހާމަކޮށްފައެވެ.
މިއީ ދަރިވަރުންނަށް އަމަލީ ގޮތުން ސާފުތާހިރުކަމުގެ މުހިންމުކަން ދަސްވި ވަރަށް ހަނދާނުގައި ހުންނާނެ ފިލާވަޅެކެވެ. ނިޔަފަތިތައް ކުރުކޮށް ބެހެއްޓުމާއި، ގަވާއިދުން އަތް ދޮވުމަކީ ބަލިތަކުން ރައްކާތެރިވުމަށްޓަކައި ކޮންމެ މީހަކުވެސް ސަމާލުކަން ދޭންޖެހޭ މުހިންމު އާދަތަކެއްކަން މި ހަރަކާތުން އަލުން ވަނީ ޔަގީންވެފައެވެ.
މި ހަރަކާތުގައި މުދައްރިސް ވަނީ ދަރިވަރުންގެ ނިޔަފަތިތަކުން ނެގި ކިލާތައް މައިކްރޮސްކޯޕުގެ ދަށަށް ލާ ދަރިވަރުންނަށް އެ މަންޒަރުތައް ވަނީ ދައްކާފައެވެ.