އޮސްޓްރިއާގެ މީހެއްގެ ގައިގާ އާދަޔާހިލާފު ގޮތަކަށް ހަރުފައެއް ވިހަލައިފިއެވެ. މިދިޔަ ހަފްތާގެ ތެރޭގައި ހިނގައިދިޔަ މި ހާދިސާއާއި ގުޅިގެން އެމީހާއަށް ފަރުވާ ދިނުމަށްފަހު މިހާރުވަނީ ދޫކޮށްލާފައެވެ.
އޮސްޓްރިއާގެ ގްރެޒް އަވަށުގައި ހިނގައިދިޔަ މިހާދިސާގެ ޝިކާރައަކަށްވެފައިވަނީ އުމުރުން 65 އަހަރުގެ ފިރިހެނެކެވެ. ރިޕޯޓުތައް ބުނާ ގޮތުގައި އޭނާގެ ގައިގައި ހަރުފައެއް ވިހަލާފައި ވަނީ އޭނާގެ ބުޑު މަސްގަނޑަށެވެ. އެއީ އޭނާ އަވަސް އަރުވާލައިގެން ފާހާނާއަށް ވަދެ ރަނގަޅަށް ބަލައިނުލާ ތަށިމަތީގައި އިނުމުން ކަމަށް ރިޕޯޓުތަކުގައި ވެއެވެ. އެ ގޮތަށް އޭނާ ފާހާނާ ތަށިމަތީ އިން އިރު، އެ ހަރުފަ ތަށިތެރޭގައި އޮތެވެ. އަދި އޭނާ ތަށިމަތީގައި އިނުމާއި އެކު މާގިނަ އިރުތަކެއް ނުވެ އެސޮރު، އޭނާގެ ބުޑުމަސްގަނޑުގައި ވިހަލިއެވެ.
އެ ސަހަރައްދުގެ ފުލުހުން ބުނާގޮތުގައި އޭނާ ދިރިއުޅޭ ކޮޓަރީގެ ފާހަނާއިން 1.6 މީޓަރުގެ ދިގު ހަރުފައެއް ފެނިފައިވާ ކަމަށެވެ. އެއީ އަލްބީނޯ ރެޓިކިއުލޭޓެޑް ޕައިތޯން އާއިލާގެ ހަރުފައެކެވެ. އެ ހަރުފަ އޭނާގެ ކޮޓަރީގެ ފާހާނާގެ ތަށިތެރެއަށް ވަންނަންވީ ސީދާ ސަބަބެއް އަދި ފުލުހުންނަށްވެސް ބުނެދޭކަށް ނޭނގެއެވެ. ނަމަވެސް އެސަރަހައްދަކީ ހަރުފައިގެ އެކި ވައްތަރު ގިނައިން ފެންނަ ސަރަހައްދެއް ކަމަށް ރިޕޯޓުތައް ބުނެއެވެ.