ޔޫރަޕްގެ ބައެއް ސަރަހައްދުތަކަށް މިހާރު ކުރިމަތިވަމުންދާ ވަރުގަދަ ހީޓްވޭވްއެއްގެ ސަބަބުން އިޓަލީ އަދި ޖަރުމަނުވިލާތުގެ ފިނިހޫނުމިން ވަރަށް ބޮޑަށް މަތިވެއްޖެއެވެ. ރިޕޯޓްތައް ބުނާގޮތުން މި ދެ ގައުމުގެ ފިނިހޫނުމިން މިހާރު ހުރީ 40 އާއި 45 ޑިގްރީ ސެލްސިއަސްއާ ދެމެދުގެ މިންވަރެއްގައެވެ. މި ގަދަ ހޫނުގެ ސަބަބުން މަގުމަތީގެ ބައެއް ޓްރެފިކް ލައިޓުތަކަށްވެސް ގެއްލުންވަމުންދާއިރު، ފޮޓޯތަކުން ފެންނަ ގޮތުގައި ބައެއް ސަރަހައްދުތަކުގެ ޓްރެފިކް ލައިޓުތައް ވަނީ ހޫނުގެ ސަބަބުން ބައްޓަން ބަދަލުވެ، ވިރެން ފަށާފައެވެ.
ކަމާބެހޭ އިދާރާތަކުން ހާމަކުރާ ގޮތުގައި، މިހާރު ކުރިމަތިވެފައިވާ އާދަޔާ ހިލާފު ގަދަ ހޫނުގެ ސަބަބުން ބައެއް ސިޓީތަކުގެ ޓްރެފިކް ލައިޓް ސިސްޓަމްތަކަށް ވަނީ މައްސަލަތައް ކުރިމަތިވެ، ބޭނުންނުކުރެވޭ ވަރަށް ހަލާކުވެފައެވެ. ހާއްސަކޮށް ގިނަ ވަގުތުތަކެއް ވަންދެން ސީދާ އަވީގެ ތެރޭގައި ހުންނަ އިކުއިޕްމަންޓްތަކަށް ބޮޑެތި ގެއްލުންތަކެއް ލިބެމުންދާކަން ފާހަގަކުރެވެއެވެ. މީގެ ސަބަބުން މަގުމަތީގެ ދަތުރުފަތުރަށާއި ނިޒާމުތަކަށް ބުރޫއަރަމުންދާ ކަމަށް ރިޕޯޓްތައް ބުނެއެވެ.
މިކަމާ ގުޅިގެން މާހިރުން އިންޒާރު ދެނީ، މިފަދަ ގަދަ ހޫނުގެ ސަބަބުން ސިޓީތަކުގެ އުމްރާނީ ވަސީލަތްތަކަށް ނުކަތާވަރަށް ބާރުބޮޑުވަމުންދާ ކަމަށެވެ. އަދި ދުނިޔޭގެ މޫސުމަށް އަންނަ ބަދަލުތައް އިތުރަށް ވަރުގަދަވަމުންދާ ވަރަކަށް، ކުރިއަށް އޮތް ތަނުގައި މިފަދަ ނުރައްކާތެރި މޫސުމީ ހާދިސާތައް ހިނގާ މިންވަރު އިތުރުވެ، ދިމާވާ މައްސަލަތައް ގިނަވެގެންދާނެ ކަމަށްވެސް މާހިރުން ބުނެއެވެ.