އިންޑިއާގެ މަދްޔަ ޕްރަދޭޝްގެ ސާގަރް ޑިސްޓްރިކްޓްގެ ސިވިލް ހޮސްޕިޓަލެއްގައި ހިނގި ނުރައްކާތެރި މެޑިކަލް އިހުމާލެއްގެ ސަބަބުން، 19 މަހުގެ ކުޑަކުއްޖެއްގެ ލޮލުގެ ފެނުން މުޅިން ގެއްލިއްޖެ ކަމަށް އެ ކުއްޖާގެ އާއިލާއިން ތުހުމަތުކޮށްފިއެވެ. ރިޕޯޓުތައް ބުނާ ގޮތުގައި، ހޮސްޕިޓަލުގެ ޑޮކްޓަރަކަށް ވަނީ އެ ކުއްޖާގެ ލޮލަށް، ނޭފަތަށް އަޅާ ކަހަލަ ނާސަލް ޑްރޮޕްސް ތަކެއް އޮޅިގެން އަޅިފައެވެ. މި ހާދިސާއާ ގުޅިގެން އެކުއްޖާގެ މުޅި އާއިލާގައި ވަނީ ބޮޑު ސިހުމެއް އުފެދިފައެވެ.
އެ ކުއްޖާގެ ބައްޕަ، އިންދްރާޖް ވިޝްވަކަރްމާ ހުށަހެޅި ޝަކުވާގައިވާ ގޮތުން، މި ހާދިސާ ހިނގާފައިވަނީ 2026 މޭ 29 ގައެވެ. އޭނާގެ ދަރިފުޅު ވިނޭ ވިޝްވަކަރްމާ ބަންޑާގައި ހުންނަ ސިވިލް ހޮސްޕިޓަލަށް ގެންދިޔައީ އަރިދަފުސް ރޯގާގެ އަލާމާތްތައް ފެނުމާއި ލޯ ރަތްވުމުގެ މައްސަލައެއް ދިމާވެގެންނެވެ. ނަމަވެސް، ފަރުވާ ދިނުމުގައި ހެދުނު ގޯހެއްގެ ސަބަބުން ކުއްޖާގެ މުޅި ދިރިއުޅުން މިވަނީ އަނދިރިކަމެއްގެ ތެރެއަށް ވެއްޓިފައެވެ.
މި މައްސަލައާ ގުޅިގެން ކުއްޖާގެ އާއިލާއިން ދަނީ އިންސާފަށް އެދި ގޮވާލަމުންނެވެ. އަދި ހޮސްޕިޓަލުގެ އިހުމާލުވި ޑޮކްޓަރާ މެދު ހަރުކަށި ފިޔަވަޅު އެޅުމަށް ގާނޫނީގޮތުން ކުރަންޖެހޭ މަސައްކަތްތައް ބައްޕަ ވަނީ ފަށާފައެވެ. ސިއްހީ މުއައްސަސާތަކުން މިފަދަ ފަރުވާކުޑަ އަމަލުތައް ހިނގުމަކީ އާންމުންގެ މެދުގައި ހޮސްޕިޓަލްތަކަށް އޮންނަ އިތުބާރު ކެނޑިގެންދާނެ ކަމެއް ކަމަށް ގިނަ ބަޔަކު ދަނީ ބުނަމުންނެވެ.