ތައިލެންޑުގެ މަޝްހޫރު ފަތުރުވެރި ސަރަހައްދެއް ކަމަށްވާ ޕަޓާޔާގައި، މަރާލުމަށްފަހު ފޮށިގަނޑެއްގެ ތެރެއަށް ލާފައި އޮތް 17 އަހަރުގެ ތައިލެންޑު އަންހެން ކުއްޖެއްގެ ހަށިގަނޑު ފެނުނު މައްސަލައެއްގައި އޮސްޓްރޭލިއާގެ ފިރިހެނަކު ހައްޔަރުކޮށްފިއެވެ. ރޮއިޓާސްއިން އާންމުކޮށްފައިވާ ގޮތުން، މި ބިރުވެރި ހާދިސާއާ ގުޅިގެން ތައިލެންޑުގެ ފުލުހުން އެމީހާ ހައްޔަރުކޮށްފައިވަނީ ޖޫން 27 ގައެވެ. މި ހާދިސާ ހިނގި ސަރަހައްދަކީ ވެރިރަށް ބެންކޮކްގެ އިރުމަތިން ގާތްގަނޑަކަށް 90 މޭލު ދުރުގައި އޮންނަ ހިސާބެކެވެ.
ހައްޔަރުކުރެވުނު ތުހުމަތުކުރެވޭ މީހާއަކީ ސައިމަން އޮޓާ ކާމަން ނަމަކަށް ކިޔާ މީހެކެވެ. އޭނާގެ މައްޗަށް ދައުލަތުން ވަނީ ނުހަނު ބޮޑެތި އަދި ސީރިއަސް ތުހުމަތުތަކެއް ކޮށްފައެވެ. މީގެ ތެރޭގައި ގަސްތުގައި މީހަކު މެރުމުގެ ކުށާއި، ހަށިގަނޑު ފޮރުވުމުގެ ކުށާއި، ހަށިގަނޑު އެއްތަނުން އަނެއްތަނަށް ބަދަލުކުރުން ނުވަތަ ހަލާކުކޮށްލުމުގެ ކުށުގެ އިތުރުން، ޖިންސީ ބޭނުމަކަށްޓަކައި ކުޑަކުއްޖަކު ރަހީނުކުރުމުގެ ކުށުގެ ދައުވާ ހިމެނެއެވެ.
މި ރަހުމްކުޑަ މީހާގެ އަމަލާ ގުޅިގެން ތައިލެންޑުގެ ފުލުހުން ދަނީ ހާދިސާ ހިނގަން މެދުވެރިވި ސަބަބުތައް އިތުރަށް ތަހުގީގު ކުރަމުންނެވެ. މި މަރުގެ ހާދިސާއާ ގުޅިގެން ކުއްޖާގެ އާއިލާއަށާއި ޕަޓާޔާގެ ރައްޔިތުންނަށް ވަނީ ބޮޑު ސިހުމެއް ލިބިފައެވެ. ކަމާބެހޭ އިދާރާތަކުން ބުނާގޮތުގައި، ކުށްވެރިޔާއަށް ގާނޫނުން ދެވޭނެ އެންމެ ހަރުކަށި އަދަބު ހޯދައިދިނުމަށް ކޯޓު މަރުހަލާގެ ކަންކަން އަވަސްކުރުމަށް ދަނީ މަސައްކަތް ކުރަމުންނެވެ.