ވިހި އަހަރުގެ މެދުކެނޑުމަކަށްފަހު ޗެކިއާ ވޯލްޑް ކަޕަށް ކޮލިފައިކޮށްދިން އެގައުމުގެ ގައުމީ ފުޓްބޯޅަ ޓީމުގެ ކޯޗު މިރޮސްލާވް ކޫބެކް މަގާމުން އިސްތިއުފާދީފިއެވެ.
ހަތްދިހަ ހަތަރު އަހަރުގެ ކޯޗު މަގާމުން އިސްތިއުފާދިނީ މިހާރު ކުރިއަށްދާ ފީފާ ވޯލްޑް ކަޕްގެ ގްރޫޕް ސްޓޭޖުން އެގައުމު ކެޓުމާ ގުޅިގެންނެވެ. ޗެކިއާ މުބާރާތުން ކެޓީ ގްރޫޕް އޭގައި ކުޅުނު މެޗުތަކުން އެންމެ ޕޮއިންޓެއް ލިބިގެން ގްރޫޕްގެ އެންމެ ފުލަށް ދިއުމުންނެވެ.
ކޫބެކް ޗެކިއާގެ ކޯޗުކަމާ ހަވާލުވީ ވޯލްޑް ކަޕްގެ ޕްލޭއޮފް މެޗުތަކާ ދިމާކޮށެވެ. އޭނާ ވަނީ ޕްލޭއޮފްގައި ރިޕަބްލިކް އޮފް އަޔަލޭންޑާއި ޑެންމާކް އަތުން ޕެނަލްޓީ ޖަހައިގެން ޗެކިއާ މޮޅުކޮށްދީ، ބޮޑު މުބާރާތުން އެގައުމަށް ޖާގަ ހޯދައިދީފައެވެ. ނަމަވެސް ވޯލްޑް ކަޕްގެ ގްރޫޕް ސްޓޭޖުގައި ސައުތު ކޮރެއާ، ސައުތު އެފްރިކާ އަދި މެކްސިކޯއާ ދެކޮޅަށް ކުޅުނު މެޗުތަކުގައި އެޓީމަށް އެދެވޭ ނަތީޖާއެއް ނެރެވޭގޮތް ވަނީ ނުވެފައެވެ.
ޗެކިއާގެ ފުޓްބޯޅަ އެސޯސިއޭޝަނުގެ ރައީސް ޑޭވިޑް ޓްރުންޑާ ބުނީ، މިއަދު ބޭއްވި ބައްދަލުވުމެއްގައި ކޯޗު އަމިއްލައަށް މަގާމުން ވަކިވާން ހުށަހެޅި ކަމަށެވެ. އަދި ދެ ފަރާތުގެ މެދުގައި ކުރެވުނު ފާޅުކަން ބޮޑު މަޝްވަރާތަކަށްފަހު، ކޯޗުގެ އިސްތިއުފާ ގަބޫލުކުރަން އެސޯސިއޭޝަނުން ނިންމާފައިވާ ކަމަށްވެސް އޮފީހުން ބުންޏެވެ.