އެމެރިކާގެ ނިއު ޖާޒީގެ ބާގަން ކައުންޓީ އެކަޑެމީސްގައި ކިޔަވަމުންދާ އުމުރުން 17 އަހަރުގެ އެޑްވަރޑް ކޭން ނަމަކަށް ކިޔާ ހައިސްކޫލް ދަރިވަރަކު، ލޮލުގެ ރެޓިނާ ސްކޭން ބޭނުންކޮށްގެން އޯޓިޒަމް އަދި އޭޑީއެޗްޑީ ދެނެގަނެވޭނެ އާދަޔާޚިލާފު އާޓިފިޝަލް އިންޓެލިޖެންސް ޓޫލެއް އުފައްދައިފިއެވެ. "ރެޓިނާމައިންޑް" ގެ ނަމުން ނަންދެވިފައިވާ މި ޓޫލަކީ ލޮލުގެ ރެޓިނާގެ ފޮޓޯތައް އެނަލައިޒްކޮށްގެން 89 އިންސައްތައިގެ ކާމިޔާބީއަކާއެކު މި ހާލަތްތައް ދެނެގަންނަ ނިޒާމެކެވެ.
މި އީޖާދު އުފެއްދުމަށް އެޑްވަރޑް ކޭންއަށް ހިތްވަރު ލިބުނީ ލޮލުގެ ސިފަތަކާއި ސިކުނޑީގެ ތަރައްގީއާ ހުރި ގުޅުންތަކުގެ މައްޗަށް ހޮންކޮންގުން ހަދާފައިވާ ދިރާސާއަކުންނެވެ. އޭނާ ވަނީ އަމިއްލައަށް ކޯޑިންގް ދަސްކޮށް، ނެޓުވޯކެއް ބިނާކޮށްފައެވެ. މި ސިސްޓަމް މަސައްކަތްކުރަނީ އިންސާނާގެ ލޮލަށް ފާހަގަނުކުރެވޭ ފަދަ ކުދި އަދި އުނދަގޫ ޖިސްމާނީ ތަފާތުތައް (ލޮލުގެ މެކިއުލާ އަދި ރެޓިނަލް ނާރވް ލޭޔަރުގެ ދިގުމިނާއި، ބޯމިނާއި ފުންމިން) ދެނެގަނެގެންނެވެ.
"އެސެންބްލް ލާނިންގ" މެދުވެރިކޮށް ތަފާތު ޕްރެޑިކްޓިވް މޮޑެލްތައް އެއްކޮށްލުމުން، މި ޓޫލަށް 89 އިންސައްތައިގެ މަތީ އެކިއުރެސީ ރޭޓެއް ލިބިފައިވެއެވެ. މިއީ މެޑިކަލް ދާއިރާއިން އޯޓިޒަމް އަދި އޭޑީއެޗްޑީ ވަރަށް ކުރީކޮޅުގައި ދެނެގަތުމަށް ލިބިގެންދާނެ ބޮޑު ކުރިއެރުމެއްގެ ގޮތުގައި ބެލެވެއެވެ.