ކިވީއަކީ މިހާރު ދިވެހީންގެ ތެރޭގައިވެސް މަޤުބޫލުކަން އިތުރުވަމުން އަންނަ މޭވާއެކެވެ. އަނގައަށް މީރު މި މޭވާއަކީ ޞިއްޙީ އެތައް ފައިދާއެއް އެކުލެވިގެންވާ މޭވާއެކެވެ. މި ލިޔުމުގައި މި ބަލައިލަނީ ކިވީއިން ލިބޭ ބައެއް ފައިދާތަކަށެވެ.

* ޑިޕްރެޝަނަށް ފަރުވާއެއް

ކިވީގައި ހިމެނޭ މާއްދާއެއް ކަމުގައިވާ އައިނޯސިޓޯލްއަކީ ހަށިގަނޑުގެ އެތެރޭގެ ސެލްތަކުގެ މެދުގައި މެސެޖުތައް ބަދަލުކޮށްދިނުމުގައި އެހީތެރިވެދޭ މާއްދާއެކެވެ. އެހެންކަމުން ކިވީއަކީ މާޔޫސްވުމާއި އެކަނިވެރިކަން ފިލުވައިދިނުމުގައި އެހީތެރިވެދޭ މޭވާއެކެވެ.

* ނޭވާލުމުގެ ނިޒާމުގެ ބަލިތަކަށް ފަރުވާއެއް 

ކިވީއަކީ ވިޓަމިން ސީ ގިނަ މޭވާއެކެވެ. އޮރެންޖުން ވިޓަމިން ސީ ލިބޭ މިންވަރުގެ ދެގުނައަށް ކިވީއިން ވިޓަމިން ސީ ލިބެއެވެ. ވިޓަމިން ސީއަކީ ނޭވާލުމުގެ ނިޒާމުގެ ބަލިތަކުން ރައްކާތެރިވުމަށް އެހީތެރިވެދޭ މާއްދާއެކެވެ.

* ޖިންސީ ނުކުޅެދުންތެރިކަމަށް ފަރުވާ ކުރެވިދާނެ

މިއީ ގިނަ ބަޔަކަށް ކުރިމަތިވާ މައްސަލައެކެވެ. ކިވީގައި ހިމެނޭ އެމިނޯއެސިޑް "އާރޖިނިން" އަކީ ލޭ ހޮޅިތައް ފުޅާކޮށްލަދޭ މާއްދާއެކެވެ. އެހެންކަމުން ޖިންސީ ނުކުޅެދުންތެރިކަން ކުރިމަތިވެފައިވާ މީހުންނަށް ފަރުވާ ކުރުމަށް ކިވީ ބޭނުން ކުރެވިދާނެއެވެ.

* ހިތުގެ ބަލިތަކުން ސަލާމަތްވުން

ހިތުގެ ދުޅަހެޔޮކަމަށް ހަށިގަނޑުގައި ސޯޑިއަމް-ޕޮޓޭސިއަމް އެކުލެވޭ ނިސްބަތް މުހިންމު ދައުރެއް އަދާކުރެއެވެ. ހިތުގެ މަސައްކަތްތައް ފުރިހަމަވެ ރަނގަޅުވާނީ ކެއުމުގައި ހިމެނޭ ސޯޑިއަމް މަދުވެފައި ޕޮޓޭސިއަމް ގިނަވާނަމައެވެ. ކިވީއަކީ ސޯޑިއަމް މަދު، ޕޮޓޭސިއަމް ގިނަ މޭވާއެއް ކަމުން ކިވީ ކެއުމުގެ ސަބަބުން ހިތުގެ ބަލިތަކުން ދުރުހެލިވެއެވެ.

މި ލިޔުމުގައި މި ބަލައިލި ފައިދާތަކަކީ ދިވެހީންގެ ތެރޭގައިވެސް މިހާރު ގިނަވެފައިވާ ބަލިތަކަކަށް ފަރުވާ ލިބިދާނެ ފައިދާތަކެކެވެ. އެހެންކަމުން އަހަރެމެންގެ ކެއުމުގައި ކިވީވެސް ބޭނުން ކުރުމަކީ ވަރަށް މުހިންމު ކަމެކެވެ.