އިންޑިއާގެ މަދްޔާ ޕްރަދޭޝްގެ އިންދޯރްގައި 100 އެނދުގެ ސިވިލް ހޮސްޕިޓަލެއް "ކަރުދާހުގައި" ހިންގަމުން އަންނަތާ 6 އަހަރު ވެފައިވާއިރު، އެތަނުގެ ޢިމާރާތުގެ އެންމެ ގަލެއްވެސް އަދިވެސް ރޭނިފައެއް ނުވެއެވެ. ޓައިމްސް އޮފް އިންޑިއާއިން ރިޕޯޓްކޮށްފައިވާ ގޮތުގައި، ބިން ހޯދުމުގައި ދިމާވެފައިވާ ދިގުލާފައިވާ މައްސަލަތަކެއްގެ ސަބަބުން ހޮސްޕިޓަލް ޢިމާރާތް ކުރުމުގެ އެއްވެސް މަސައްކަތެއް އަދި ފެށިފައެއް ނުވެއެވެ.
ނަމަވެސް، އެންމެ ހައިރާން ކުރުވަނިވި ކަމަކީ މި ހޮސްޕިޓަލަށް ބޭނުންވާ 87 މުވައްޒަފުންގެ މަޤާމު ފުރާފައިވުމެވެ. މި މުވައްޒަފުންނަށް މިހާރު މުސާރަދެމުން ދަނީ އެހެނިހެން ޞިއްޙީ މަރުކަޒުތަކާއި ހޮސްޕިޓަލްތަކުގައި ވަޒީފާ އަދާކުރާ ގޮތަށް ހަމަޖައްސައިގެންނެވެ. އަދި ހަ އަހަރު ވަންދެން މިއީ ހިނގަ ހިނގާ ހުރި ހޮސްޕިޓަލެއްކަމަށް ލިޔެކިޔުންތަކުގައި ފެންނަންވެސް އެބަ އޮތެވެ. މިއީ އިދާރީގޮތުން ހިނގާފައިވާ ވަރަށް ބޮޑު އިހުމާލެއްގެ ގޮތުގައި ގިނަ ބަޔަކު ސިފަކުރެއެވެ.
މައްސަލައިގައި ސަރުކާރުން ބުނަމުންދަނީ ހޮސްޕިޓަލް އެޅުމަށް އެކަށީގެންވާ ބިމެއް ލިބުން ދަތިވެފައިވާ ކަމަށެވެ. އެހެންނަމަވެސް، އިދިކޮޅު ލީޑަރުން ދަނީ މިއީ އިދާރީ ނިޒާމު ފޭލްވުން ކަމަށް ބުނެ، މިކަން ހިނގާދިޔަ ގޮތް ވަރަށް ފުރިހަމައަށް ތަޙުޤީޤު ކުރުމަށް ސަރުކާރަށް ގޮވާލަމުންނެވެ.