ގައުމަކަށް މިނިވަންކަން ލިބި، އެ މިނިވަންކަންމަތީ ދެމި ހުރުމުގެ ކުޅަދާނަކަމާއި ގާބިލުކަމަކީ ފަސޭހަކަމާއެކު ކުރެވޭނޭ ކަމެއް ނޫނެވެ. އެ މިނިވަން ކަމެއްގެ ދިފާއުގައި އެތައްބަޔަކު އެތައް ގުރުބާނީއެއް ވާނޭ ކަމީ ދެބަސްވެވެން ނެތް ސާފު ހަގީގަތެވެ.

ދިވެހި ޖައްވު، މިނިވަންކަމުގެ ނޭވާ ލާތާ 56 އަހަރު ފުރިއްޖެއެވެ. މިއަދުގެ ދިރިތިބީން މި ނޭވާ މިގޮތަށް ލަމުން ދާއިރު، ހަނދާނުގައި ބަހައްޓަންޖެހޭ ކަމަކީ މިއީ އެތަކެއް ބައެއްގެ ބުރަ މަސައްކަތް ކަމެވެ. ނަމަވެސް މި އުފާވެރި މިނިވަން ދުވަހުގައި ދައްކަން މިޖެހެނީ މުޅިއަކުން ގައުމު އެވާހަކައަކާއި މެދު ފަހުރުވެރިވާނޭ ވާހަކައެއްނޫނެވެ. އަދި ކިއެއްތަ މިއީ އެ ވާހަކައަކާއި މެދު ގައުމު ލަދުވެތިވެ، ކާބަފައިން ނަފްރަތު ކުރާނޭ ވާހަކައެކެވެ.

މިނިވަން ދުވަހުގެ މުނާސަބަތުގައި ބޮޑެތި ހަފްލާތަކާއި ކުލަގަދަ ރަސްމިއްޔާތުތައް ބޭއްވެއެވެ. ގައުމުގެ ރަމްޒު ކަމުގައިވާ ގައުމީދިދަ، މިނިވަންކަމާއި އެކީ ޖައްވުގައި ވިހުރާލައެވެ. ދިވެހި ސަގާފީ ނެށުންތަކާއި ކުޅިވަރުތަކުން މުނިފޫހިފިލުވާއިރު، ސަގާފީ ފޭރާމުން ނަލަހެދިފައި ތިބޭލެއް އަމުދަކުން މަދެއް ނޫނެވެ. މި ހުރިހާ ކަމެއް އަޅުގަނޑުމެންގެ ތެރެއިން ފެނިގެން ދިޔަނަމަވެސް ހިތާމައިގެ މައްޗަށް ހިތާމަކުރަން ކަމެއް އެބަ ކުރެވެއެވެ. އެއީ މިކަން ހިނގައި ދިޔަ ގޮތް ހަނދާންނައްތާލުމެވެ. ގައުމީ އަބުޠާލުންގެ ވާހަކަ މުޅިންހެން ދެއްކުން ހުއްޓާލުމެވެ.

ދަންނަވަން މިއުޅޭ ވާހަކަ، ހިޔާލީ ހާދިސާއަކުން ސިފަކޮށްދޭނަމަވެ.

"އާދޭހެވެ. ވަރަށް ރީތިކޮށް ނަލަހެދިލައިގެން މިނިވަން ދުވަހުގެ ރަސްމިޔާތެއް ހުށަހަޅައިދޭން އިން ސުކޫލު ކުއްޖެކެވެ. އުމުރުން 15 ވަރަކަށް އަހަރުގެ އަންހެން ކުއްޖެކެވެ. ރީތި ރާގުރާގަށް އެކިފަހަރު އެކި ޅެން ބައިތު ކިޔާލައެވެ. ކިޔަނީ ލިޔެފައި އޮތް ގަނޑެއް ބަލައިގެންނެވެ. އެ ކުއްޖާގެ ފަހަތުގައި އެ ކުއްޖާގެ މުދައްރިސް ވެސް ބައެއް ފަހަރު ހުންނާތީ ދެކެމެވެ.

މި ރަސްމިއްޔާތަކީ ސަރުކާރުގެ ބޮޑުން ބައިވެރިވާ ކުލަގަދަ ހަފްލާއެކެވެ. ޝަރަފުވެރި މެހެމާނަކީ ކާކުކަން ނޭނގޭވަރަށް ޝަރަފުވެރިން ގިނަ ރަސްމިއްޔާތެކެވެ. ކޮންމެއަކަސް އާރުލާ ދައްކާ ކިތަންމެ ވާހަކައެއް އެ ރަސްމިއްޔާތުގައި ދެއްކިއްޖެއެވެ. 

ރަސްމިއްޔާތު ނިމި އެންމެން ހޭލަމޭލިވާންފެށި ހިސާބުން، މި ދެންނެވި ޝަރަފުވެރިންކުރެ ޝަރަފުވެރިއަކު އައިސް އެއްކަލަ އަންހެން ކުއްޖާގާތު ސުވާލެއް ކޮށްލައިފިއެވެ. މިއަދަކީ ކޮން ދުވަހެއްތޯ ސުވާލުކުރިއެވެ. އެކުއްޖާގެ ޖަވާބަކީ މިއީ މިނިވަން ދުވަހެވެ. ދެން އެމީހަކު އަނެއްކާ އެކުއްޖާ ގާތުން މިއަދަށް މިނިވަން ދުވަހޭ ކިއުނީ ކީއްވެތޯ އެހިއެވެ. އެ ކުއްޖާގެ ޖަވާބަކީ އެއީ ރާއްޖެ މިނިވަން ވީމައެވެ. ދެން އިރުތަށް ދުވަހާއި ބެހޭގޮތުން އެމީހަކު އެ ކުއްޖާއަށް ކުރި ސުވާލުތަކުން އެ ކުއްޖާއަށް ދޭނޭ އިތުރު ޖަވާބެއް އެ ސިކުނޑިއަކުން ނުނިކުތެވެ. އާދޭހެވެ. އެ ކުއްޖާ އެދިނީ މުޅިއަކުން ގޯސް ޖަވާބެއް ނޫނެވެ. ނަމަވެސް އެހާ ކުލަގަދަ ކުލައެއް ތުންފަތުގާ ޖައްސާ، އެހާ ކުލަގަދަ ހެދުމެއްގައި، އެހާމެ ރީތި ޅެންބައިތުތަކެއް، އަދި އެހާމެ ރީތި ރާގަކަށް ކީއިރު، އެހާމެ ފުރިހަމައަށް، ދުވަހަކީ "ކޮން ދުވަހެއްކަން" ބުނެދޭކަން ނޭނގުނެވެ."

މި ހިޔާލީ ހާދިސާއިން އަދުގެ މަންޒަރު ސިފަ ކުރެވެއެވެ. މިފަދަ ތާރީޚީ އަދި ގައުމީ ދުވަހެއް ފާހަގަ ކުރުމުގެ ހަގީގީ ބޭނުން އޮޅިއްޖެއެވެ. މިނިވަން ދުވަހަކީ ހަމަ ގައިމުވެސް ކޮންމެ މީހަކުވެސް އުފާވާނޭ ދުވަހެކެވެ. އެ އުފަލުން ޒީނަތްތެރިވަމުން ދާއިރު، އެ އުފާ ތިބާއަށް ލިއްބައިދިނުމުގެ ހަގީގީ ސަބަބު ކޮބާހެއްޔެވެ؟

ގައުމީ ދުވަސްތަކާއި މިނޫންވެސް މިގޮތަށް ފާހަގަކުރެވޭ ކޮންމެ ދުވަހެއްގެ ވާހަކައަކީ ތަފްސީލީ ނަޒަރަކުން އެ ވާހަކަތަކެއް ކިޔެން ޖެހޭނޭ ވާހަކަ ތަކެކެވެ. ދުވަހުގެ އުފާ ލިބިގަތުމަކުން ނުފުދޭނެއެވެ.