ކެނެޑާގައި ނިދާފައި އޮއްވާ މޫނުމައްޗަށް ވާލެއް ވެއްޓުނު 11 އަހަރުގެ ފިރިހެން ކުއްޖަކު، ވާލުން ފެތުރޭ ނުރައްކާތެރި ބައްޔެއް ކަމަށްވާ ރޭބީޒް ޖެހިގެން މަރުވެއްޖެއެވެ. "ކެނޭޑިއަން މެޑިކަލް އެސޯސިއޭޝަން ޖާނަލް" (CMAJ) ގައި ޝާއިއުކުރި ސައިންޓިފިކް ރިޕޯޓެއްގައި ބުނެފައިވަނީ، މިއީ ވާލުގެ ފަރާތުން އިންސާނުންނަށް ފޮރުވިފައިވާ ބޮޑު ނުރައްކަލެއް އޮތްކަން ހާމަކޮށްދޭ ހާދިސާއެއް ކަމަށެވެ.
މި ހާދިސާ ހިނގާފައިވަނީ 2024 ވަނަ އަހަރުގެ ހޫނު މޫސުމުގައި، އެ ކުއްޖާ ކެނެޑާގެ ނޮދަން އޮންޓޭރިއޯގައި ހުންނަ އޭނާގެ އާއިލާގެ ގެއެއްގައި ނިދާފައި އޮއްވައެވެ. ކުއްޖާ ހޭލެވުނުއިރު އޭނާގެ ނޭފަތާއި އަނގަމަތީގައި ވާލެއް އޮތް ނަމަވެސް، އޭނާގެ ހަށިގަނޑުން ވާލެއް ދަތްއަޅާފައި ނުވަތަ ކޮށްޓާފައި ހުރި އެއްވެސް ކަހަލަ ފާހަގައެއް ފެންނާކަށް ނެތެވެ. ނަމަވެސް ފަހުން އެ ކުއްޖާ ވަނީ ރޭބީޒް ބަލީގެ އަލާމާތްތައް ފެނި، ހިތާމަވެރި ގޮތަކަށް މަރުވެފައެވެ.
މި ރިޕޯޓުގައި ސައިންސްވެރިން ވަނީ ވާލުގެ ފަރާތުން ދިމާވެދާނެ މިފަދަ ސިއްހީ ނުރައްކާތަކަށް އާންމުން ވަރަށް ބޮޑަށް ސަމާލުވުމަށް އިންޒާރު ދީފައެވެ. ހާއްސަކޮށް ހަށިގަނޑުން ދަތްއެޅި ނިޝާނެއް ފެންނަން ނެތް ނަމަވެސް، ވާލެއް ފަދަ ޖަނަވާރަކާ މިގޮތަށް ދިމާވެއްޖެނަމަ ލަސްނުކޮށް ސިއްހީ ފަރުވާ ހޯދުމަކީ މުހިންމު ކަމެއްކަން މި ހާދިސާއިން ވަނީ ހާމަވެފައެވެ.