އުފަންވުމުގައި ރަހިމު ނެތް އަންހެނަކު ދުޅަހެޔޮކޮށް އޮތް ކުއްޖަކު ވިހައިފިއެވެ. އެމެރިކާގެ އިޔޫޓާ ސްޓޭޓަށް ނިސްބަތްވާ އަމަންޑާ ގްރޫނެލް ނަމަކަށް ކިޔާ އުމުރުން 32 އަހަރުގެ މި އަންހެންމީހާ އުފަންވި އިރު އޭނާގެ ރަހިމު ނެތްކަން ޑަކްޓަރުން ވަނީ ބުނެފައެވެ. ނަމަވެސް އޭނާ އަށް އެކަން އެނގުނީ އުމުރުން 16 އަހަރުގައި މައްސަރު ކަންތައް ދިމާނުވާތީ ޑަކްޓަރަށް ދެއްކުމުންނެވެ.
އަމަންޑާ ބުނީ އޭނާ ދަރިއަކު ހޯދަން ކިތަންމެ ބޭނުންވެފައިވީ ނަމަވެސް އެ އުފާ ނުލިބޭނެ ކަމަށް ކުރިން ހީކުރެވުނެވެ. ނަމަވެސް ރައްޓެއްސެއް ދިން ހިޔާލު އޭނާގެ މުޅި ހަޔާތް ބަދަލުކޮށްލި ކަމަށެވެ. އެމީހުން ރަހިމު ޓްރާންސްޕްލާންޓް ކުރެވޭނެ ކަމަށް ބުނުމުން އޭނާއާއި އޭނާގެ އާއިލާއިން އެކަމަށް ތައްޔާރުވާން ފެށިއެވެ.
ރަހިމު ޓްރާންސްޕްލާންޓް ކުރުމަށް އާއިލާ އާއި ރައްޓެހިންގެ ފަރާތުން ބޮޑު އެއްބާރުލުމެއް ލިބުނެވެ. އަމަންޑާ އޭނާ ދެކެމުން އައި ހުވަފެން ހަގީގަތަކަށް ވިއެވެ. އަމަންޑާ ޓްރާންސްޕްލާންޓް ހަދާފައި ވަނީ ކްލޭވްލެންޑް ކްލިނިކްސް ޔުޓޭރައިން ޓްރާންސްޕްލާންޓޭޝަން ޓްރައިލް ޕްރޮގްރާމެއްގައި ބައިވެރިވެގެންނެވެ.
ޓްރާންސްޕްލާންޓް ހެދުމަށްފަހު މުޅިން ފަސޭހަވުމުން އަނަންޑާ އައިވީއެފް (އިން ވިޓްރޯ ފާޓިލައިޒޭޝަން) ހަދައި މާ ބަނޑުވިއެވެ.
އަމަންޑާ ވިހާފައި ވަނީ މި އަހަރުގެ މާރިޗް މަހުގައެވެ. އޭނާ އަށް ލިބިފައި ވަނީ އަންހެން ކުއްޖެކެވެ. އެ ކުއްޖާގެ ސިއްހަތު ފުރިހަމަ ކަމަށާއި އެ ކުއްޖާގެ ކިބައިގައި ތަފާތު އެއްވެސް ކަމެއް ނެތްކަމަށް ޑަކްޓަރުން ބުނެއެވެ.