2026 ވަނަ އަހަރުގެ ވޯލްޑް ކަޕްގެ ގަދަ 16 ގައި އާޖެންޓީނާ އާއި މިސްރު ކުޅުނު މެޗުގައި ރެފްރީންގެ ނިންމުންތައް ގޯސްކަމަށް ބުނެ މިސްރުން ހުށަހެޅި ޝަކުވާތަކަށް ފީފާއިން ރައްދުދީ، ރެފްރީންގެ ނިންމުންތައް ދިފާއުކޮށްފިއެވެ.
ފީފާގެ ޗީފް ރެފްރީންގް އޮފިސަރު ޕިއެލުއީޖީ ކޮލީނާ ބުނީ ފްރާންސްގެ ރެފްރީ ފްރާންސުވާ ލެޓެކްސިއޭގެ ޓީމުން އަމަލުކޮށްފައިވަނީ ވަރަށް މިނިވަންކަމާއެކު ކަމަށާއި، ހާއްސަކޮށް ވީއޭއާރު މެދުވެރިކޮށް މިސްރުގެ ގޯލެއް ކެންސަލްކުރަން ނިންމި ނިންމުމަކީ މުޅިން ރަނގަޅު ނިންމުމެއް ކަމަށެވެ.
މި މެޗުގައި ފުރަތަމަ ދެ ގޯލު ޖަހައި ކުރިހޯދީ މިސްރުންނެވެ. އެހެންނަމަވެސް މެޗުގެ ފަހުކޮޅު އާޖެންޓީނާގެ ކްރިސްޓިއަން ރޮމޭރޯ، ލިއޮނެލް މެސީ އަދި އެންޒޯ ފެނާންޑޭޒް ޖެހި ގޯލުތަކާއެކު 3-2 އިން މެޗު ކާމިޔާބުކުރީ އާޖެންޓީނާއިންނެވެ. މި ނަތީޖާއާ ގުޅިގެން މިސްރުގެ ފުޓުބޯޅަ އެސޯސިއޭޝަނާއި، ކޯޗު ހޮސާމް ހަސަންގެ އިތުރުން ކުޅުންތެރިން ވަނީ ރެފްރީން ބޭއިންސާފު ކަމަށާއި މެޗު ފިކްސްކޮށްފައިވާ ކަމަށް ބުނެ ފީފާއަށް ރަސްމީކޮށް މައްސަލަ ހުށަހަޅާފައެވެ.
މިސްރުން މިފަދަ ތުހުމަތުތަކެއް ކުރި ނަމަވެސް، ކުޅިވަރު ދިރާސާކުރާ ގިނަ ފަރާތްތަކަކާއި ނިއުޓްރަލް ސަޕޯޓަރުން އަންނަނީ އާޖެންޓީނާ ދިފާއުކޮށް ވާހަކަދައްކަމުންނެވެ. އެގޮތުން ދެވަނަ ހާފުގައި އާޖެންޓީނާއިން މޮޅު ކުޅުމެއް ދައްކައި ގިނަ ހަމަލާތަކެއް އުފައްދާފައިވާކަން ފާހަގަކޮށް، މިއީ އެއްވެސް ބައެއްގެ ނުފޫޒެއް އޮވެގެން ނުކުތް ނަތީޖާއެއް ނޫންކަމަށް އެ ފަރާތްތަކުން ބުނެއެވެ. ފީފާއިން ވެސް ރެފްރީންގެ ނިންމުންތަކަށް ތާއީދުކޮށްފައިވާއިރު، މި މެޗުގެ ނަތީޖާ ބަދަލުކުރާނެ އެއްވެސް އިޝާރާތެއް އަދި މިހާތަނަށް ދީފައެއް ނުވެއެވެ.