އިންސާނާގެ ހަޔާތަކީ އޮމާން، ހަމަހިމޭން ކަނޑެއް ފަދަ އެއްޗެއް ނޫނެވެ. ދިރިއުޅުމުގެ ދަތުރުގައި ކޮންމެ މީހަކަށްވެސް އެކި ކަހަލަ ތޫފާންތަކާ ކުރިމަތިލާންޖެހެއެވެ. ބައެއް މީހުން ހީކުރާ ގޮތުގައި އެއްވެސް ތުރާލެއް، ހިތާމައެއް ނުވަތަ ނާކާމިޔާބީއެއް ނެތި "އޮމާންކޮށް" ބޮޑުވުމަކީ ނަސީބެކެވެ. ނަމަވެސް، ހަގީގަތަކީ ހަޔާތުގެ ތަޖުރިބާތަކުން ހިތުގައި ނުވަތަ ނަފްސުގައި "ލަކުނެއް" ނުލާ ބޮޑުވާ އިންސާނާއަކީ، މި ކެހިވެރި އަދި ބަދަލުވަމުންދާ ދުނިޔޭގެ ހަގީގަތްތަކާ ކުރިމަތިލާން އަދި އެއްވެސް ވަރަކަށް ތައްޔާރުވެފައި ހުރި މީހެއް ނޫނެވެ.
ކޮންމެ ލަކުނަކީ ވެސް އޭގެ ފުރަގަހުގައި ވަރުގަދަ ވާހަކައަކާއި، އަގުބޮޑު ފިލާވަޅެއް އެކުލެވޭ އެއްޗެކެވެ. ލޯބިވާ މީހަކު ކޮށްލާ ކެހިވެރިކަމެއް، ރޭވުމެއް ނާކާމިޔާބުވުން، ނުވަތަ ދިރިއުޅުމުގެ ކޮންމެވެސް ހިސާބަކުން ލިބޭ ބޮޑު ދެރައަކީ ނަފްސަށް ލިބޭ ރިހުމެކެވެ. އެ ރިހުން ފަސޭހަވެގެންދާއިރު އުފެދޭ ލަކުނަކީ ތިމާގެ ހިތްވަރުގަދަކަމުގެ ނިޝާނެކެވެ. އެފަދަ ހާދިސާތަކުން ދަސްވާ ފިލާވަޅުތަކުގެ އެހީގައި މީހާ ހަރުދަނާވެ، މީހުންނަށް އިތުބާރުކުރަންވީ މިންވަރާއި، ދުނިޔޭގެ މުނާފިގުކަން ދެނެގަންނަން އެނގެއެވެ.
އެއްވެސް ހުރަހެއް ނެތި، ހުރިހާ ކަމެއް ފަސޭހައިން ލިބި، ރައްކާތެރި މާހައުލެއްގައި އެކަނި ބޮޑުވާ މީހާއަށް ދުނިޔޭގެ އަނދިރި ފަރާތް ފެނިފައެއް ނުހުރެއެވެ. ނަތީޖާއެއްގެ ގޮތުން، ފުރަތަމަ ފަހަރަށް ވެސް ދިރިއުޅުމުގައި ކެހިވެރިކަމަކާ ނުވަތަ ބޮޑު ގޮންޖެހުމަކާ ކުރިމަތިލާންޖެހޭ ހިނދު، އެމީހެއްގެ މުޅި ނަފްސު ބަލިކަށިވެ، ހަދާނެގޮތް ހުސްވެއެވެ. އެއީ ދިރިއުޅުމުގެ ހޫނުން ސަލާމަތްވުމަށް ބޭނުންވާ ނުވަތަ ނަފްސާނީ ހިތްވަރު (ޜެސިލިެނޗެ) އެމީހެއްގެ ކިބައިގައި އުފެދިފައި ނެތުމުންނެވެ.
އެހެންކަމުން، ދިރިއުޅުމުގައި ލިބޭ ކޮންމެ ޒަޚަމަކާއި ލަކުނަކީ ތިމާ ބަލިކަށިކޮށްލާ އެއްޗެއްގެ ގޮތުގައި ދެކުން ހުއްޓާލަންޖެހެއެވެ. އެއީ މި ކެހިވެރި ދުނިޔޭގައި ފައިތިލަ ސާބިތުކޮށްގެން ކުރިއަށްދާން ދަސްކޮށްދޭ ގުދުރަތީ ތަމްރީނެކެވެ. ހަގީގީ ދިރިއުޅުމަކަށް ތައްޔާރުވެފައިވާ މީހަކީ، އޭނާގެ ހަށިގަނޑާއި ހިތުގައި ހުރި ލަކުނުތަކަށް ބަލައި، އެއީ ތިމާ ވެއްޓުނު ނަމަވެސް އަލުން ތެދުވިކަމުގެ ހެކިތަކެއް ކަމުގައި ދެކޭ މީހާއެވެ.