އިންޑިއާގެ އަސާމްގެ ސިވަސާގަރުގެ ބޯފުކަން ތިނިއާލީއަށް ނިސްބަތްވާ ބާބުލް އަލީ ނަމަކަށް ކިޔާ ނުކުޅެދުންތެރިކަން ހުންނަ މީހަކު، އަމިއްލަ ނަފްސަށް އޮތް އިތުބާރާއި ހިތްވަރުގެ ސަބަބުން ގިނަ ބައެއްގެ ސަމާލުކަން ހޯދައިފިއެވެ. ޖިސްމާނީ ގޮތުން ބޮޑެތި ނުކުޅެދުންތެރިކަންތައް ހުރި ނަމަވެސް، އޭނާ ވަނީ ދިރިއުޅުމަށްޓަކައި އެހެން އެއްވެސް މީހެއްގެ އެހީތެރިކަމަށް ބަރޯސާވުމަށް ސާބިތުކަމާއެކު އިންކާރުކޮށްފައެވެ.
ބާބުލް ކޮންމެ ދުވަހަކު ވެސް ދަނޑު ބިންތަކަށް ނިކުމެ، ދަނޑުވެރިކަމުގެ މަސައްކަތް ކުރަނީ ޕްލާސްޓިކް ގޮނޑިއެއްގައި އިށީނދެގެން އިނދެއެވެ. އޭނާ އަމިއްލައަށް ބިންގަނޑު ކޮނެ، ގޮނޑި އަނބުރަމުން ދަނޑުވެރިކަން ކުރަނީ އެހެން މީހުންގެ ކުރިމަތީގައި ސަލާންޖެހުމުގެ ބަދަލުގައި، އަބުރުވެރި އަދި ޝަރަފުވެރި އާމްދަނީއެއް ހޯދުމުގެ ބޭނުމުގައެވެ.
އޭނާގެ މި ދިރިއުޅުމުގެ ވާހަކައަކީ މަސައްކަތްތެރިކަމުގެ ހަގީގީ އަގާއި، ކޮންމެ ފަދަ ހާލަތެއްގައި ވެސް ހިތްވަރު އެލާނުލައި ކުރިއަށްދެވިދާނެކަން މުޅި ދުނިޔެއަށް ސާބިތުކޮށްދޭ އަސަރުގަދަ ނަމޫނާއެކެވެ. ސޯޝަލް މީޑިއާގައި ގިނަ ބަޔަކު ދަނީ އޭނާގެ އެ ނުގުޑާފަދަ އަޒުމަށް ސާބަސްދީ ތައުރީފުކުރަމުންނެވެ.