މިހާރު ކުރިއަށްދާ 2026 ވަނަ އަހަރުގެ ވޯލްޑް ކަޕް ފުޓްބޯޅަ މުބާރާތަށްފަހު، 2030 ވަނަ އަހަރު ބާއްވާ ވޯލްޑް ކަޕްގައި ވާދަކުރާ ޓީމުތަކުގެ އަދަދު 64 އަށް ބޮޑުކުރުމުގެ ހުށަހެޅުން ފީފާގެ ކޮމިޓީތަކުން ދިރާސާކުރަން ތައްޔާރުވަމުންދާކަން ފީފާގެ ރައީސް ޖިއާނީ އިންފަންޓީނޯ ހާމަކުރެއްވިއެވެ. ސްވިޒަލޭންޑުގެ މީޑިއާއަކަށް ދެއްވި ބަސްދީގަތުމެއްގައި އިންފަންޓީނޯ ވިދާޅުވީ، މި ބަދަލު ގެނައުމުގެ މައިގަނޑު ބޭނުމަކީ ހަމައެކަނި ބާރުގަދަ ގައުމުތަކުގެ ބަދަލުގައި މުޅި ދުނިޔޭގެ ހުރިހާ ހިސާބެއްގެ ކުދި ގައުމުތަކަށްވެސް މި އިންޓަނޭޝަނަލް މުބާރާތުގައި ވާދަކުރުމުގެ ފުރުސަތު ހުޅުވާލައި، އެ ގައުމުތަކުގެ ފުޓްބޯޅަ ކުރިއެރުވުމަށް ހިތްވަރު ދިނުމެވެ.
މިހާރު އެމެރިކާ، ކެނެޑާ އަދި މެކްސިކޯގައި 48 ޓީމާއެކު ބާއްވަމުންދާ ވޯލްޑް ކަޕަކީ 100 ޕަސަންޓު ކާމިޔާބު މުބާރާތެއްގެ ގޮތުގައި އިންފަންޓީނޯ ވަނީ ސިފަކުރައްވާފައެވެ. އޭނާ ވިދާޅުވީ މުބާރާތް ބޮޑުކުރުމުން ކޮލިޓީ ދަށްވާނެ ކަމަށް ބުނެ ކުރި ފާޑުކިޔުންތަކާ ހިލާފަށް، ހުރިހާ ބައްރުތަކެއްގެ ގައުމުތަކުންވެސް މަތީ ފެންވަރުގެ ކުޅުމެއް ދައްކާފައިވާ ކަމަށެވެ. ހާއްސަކޮށް އެފްރިކާ ބައްރުން ވާދަކުރި 10 ޓީމުގެ ތެރެއިން 9 ޓީމު ގްރޫޕް ސްޓޭޖް ފަހަނައަޅައި ދެވަނަ ބުރަށް ދިއުމަކީ، މުބާރާތް ފުޅާކުރުމުން ކުދި ގައުމުތަކުގެ ފުޓްބޯޅަ ކުރިއަރަމުންދާ ކަމުގެ ސާފު ހެއްކެއް ކަމަށް އިންފަންޓީނޯ ފާހަގަކުރެއްވިއެވެ.
އިންފަންޓީނޯ އިތުރަށް ވިދާޅުވީ، ވޯލްޑް ކަޕަކީ ހަމައެކަނި ޔޫރަޕާއި އެމެރިކާގެ ބާރުގަދަ ގައުމުތަކަށް އެކަނި އޮތް މުބާރާތެއް ނޫން ކަމަށާއި، އެއީ މުޅި ދުނިޔެއަށް ހުޅުވާލެވިފައިވާ މުބާރާތަކަށް ވާންޖެހޭނެ ކަމަށެވެ. ސްޕެއިން، ޕޯޗުގަލް އަދި މޮރޮކޯގައި 2030 ވަނަ އަހަރު ބާއްވާ ވޯލްޑް ކަޕް 64 ޓީމަށް ބޮޑުކުރުމުގެ ރަސްމީ ހުށަހެޅުމެއް ސައުތު އެމެރިކާގެ ފުޓްބޯޅަ އިދާރާއިން ހުށަހަޅާފައިވާއިރު، މި ބަދަލަށް ޔޫރަޕްގެ ބައެއް އިސްވެރިން ދަނީ ފާޑުކިޔަމުންނެވެ. އެ ބޭފުޅުން ކަންބޮޑުވުން ފާޅުކުރަނީ މެޗުތައް ގިނަވުމުގެ ސަބަބުން ކުޅުންތެރިންނަށް ބާރު ބޮޑުވެ، މުބާރާތުގެ ފޯރި ކުޑަވެދާނެތީއެވެ. ނަމަވެސް މި ހުށަހެޅުމާ މެދު ފަހުގެ ނިންމުމެއް ނިންމާނީ މިހާރު ކުރިއަށްދާ ވޯލްޑް ކަޕް ނިމުމުން ފީފާގެ ހާއްސަ ކޮމިޓީތަކުން ދިރާސާކުރުމަށްފަހުގައެވެ.