ފަލަކީ ޢިލްމުވެރިން ވަނީ އަޅުގަނޑުމެންގެ ގެލެކްސީ ކަމަށްވާ މިލްކީ ވޭ ގެ މެދުތެރޭގައިވާ ތަރިތަކުގެ މެދުގައިވާ ހިރަފުހާއި ގޭހުގެ ބޯ ވިލާތަކުގެ ތެރެއިން، ރާސްބެރީ އިން ފެންނަ ފަދަ ގުދުރަތީ ހަކުރުގެ ބާވަތެއް ހޯދާފައެވެ. މި ހޯދުމަކީ، ދިރިއުޅުމުގެ އަސާސީ ބިނާކުރުމަށް މުހިންމުވާ މާއްދާތައް ތަރިތަކުގެ ދެމެދުގައިވާ ފުޅާ ފަޒާގެ ތެރޭގައި އުފެދިދާނެކަން ފުރަތަމަ ފަހަރަށް ސާބިތުކޮށްދިން ހޯދުމެކެވެ. މީގެ ސަބަބުން، ދިރިއުޅުން އުފެދުމަށް މުހިންމުވާ އެހެނިހެން މޮލިކިއުލްތައް ވެސް ފަޒާގެ ތެރެއިން ފެނިދާނެކަމުގެ އުންމީދު ވަނީ ވަރަށް ބޮޑަށް އާވެފައެވެ.
ސްޕެއިންގެ ސެންޓަރ ފޮރ އެސްޓްރޯބަޔޮލޮޖީގެ ފަލަކީ ޢިލްމުވެރިންގެ ޓީމަކުން އިސްނަގައިގެން ހޯދި މި ހަކުރަށް ކިޔަނީ އެރިތުރިއުލޯސް އެވެ. މިއީ ހަތަރު ކާބަން އެޓަމްގެ މައްޗަށް އެކުލެވިގެންވާ ހަކުރެކެވެ. ދިރޭތަކެތީގެ ނިޒާމުގައި ހަކުރަކީ ނުހަނު މުހިންމު ދައުރެއް އަދާކުރާ އެއްޗެކެވެ. އެގޮތުން ހަށިގަނޑަށް ބޭނުންވާ ހަކަތަ ފޯރުކޮށްދިނުމަށާއި، ބަޔޮލޮޖިކަލް އޮނިގަނޑުތައް ބިނާކުރުމަށާއި، އަދި ޖެނެޓިކް މާއްދާތައް ކަމަށްވާ އާރްއެންއޭ އާއި ޑީއެންއޭ ގެ ބައިތައް އުފެއްދުމަށް މިއީ ކޮންމެހެން ބޭނުންތެރި އެއްޗެކެވެ.
މި ހޯދުމުގެ ސަބަބުން ކާއިނާތުގައި ދިރިއުޅުން އުފެދުމުގެ އަސްލާ ބެހޭގޮތުން ކުރެވޭ ދިރާސާތަކަށް އައު ދޮރުތަކެއް ހުޅުވިގެންދެއެވެ. ފަޒާގެ ތެރޭގައި މިފަދަ ބައޮލޮޖިކަލް މާއްދާތައް އުފެދި، ދައުރުވަމުންދާކަން އެނގުމަކީ ދުނިޔެއިން ބޭރުގައިވެސް ދިރިއުޅުމަށް މަގުފަހިވާނެ ފަދަ މާހައުލުތައް ހުރެދާނެކަމުގެ ވަރުގަދަ ހެކިތަކެއް ލިބިގެންދާ ކަމެކެވެ. މި ހޯދުމުގެ ފޮޓޯތައް ނަގާފައިވަނީ ނާސާ އަދި ކަލްޓެކް ގެ އެހީގައެވެ.