ކުޑަކުދިންނަށް ޖިންސީ ގޯނާކުރި މައްސަލައެއްގެ ޝަރީއަތް ހިނގަމުންދަނިކޮށް، މީގެ ވިއްސަކަށް އަހަރު ކުރިން ފިލި އެމެރިކާގެ ކުރީގެ ޑޮކްޓަރަކު އަތުލައިގަނެފިއެވެ. ރޯޑް އައިލެންޑްގެ ކުރީގެ އެނެސްތީސިއޮލޮޖިސްޓެއް ކަމަށްވާ ރޮނަލްޑް އެލް. ފިޝަރ ހައްޔަރުކޮށްފައިވަނީ 2005 ވަނަ އަހަރުން ފެށިގެން ފިލައިގެން އުޅެނިކޮށެވެ.
އެމެރިކާގެ ފެޑެރަލް ބިއުރޯ އޮފް އިންވެސްޓިގޭޝަން (އެފްބީއައި) އިން ހާމަކޮށްފައިވާ ގޮތުގައި، ގިނަ ދުވަސްތަކެއް ވަންދެން ފިލައިގެން އުޅުނު މި މީހާ އަތުލައިގަނެފައިވަނީ ނިއު ޖަރޒީގެ އައްސޭރިފަށުގައި އޮތް ރިޔާ ދޯންޏެއް (ސެއިލްބޯޓެއް) ގެ ތެރޭގައި ދިރިއުޅެމުން ދަނިކޮށެވެ. އޭނާ ހައްޔަރުކުރިއިރު، އެތައް އަހަރެއް ވަންދެން ކަމާބެހޭ ފަރާތްތަކަށް ފިލައިގެން އުޅުމަށް އޭނާ ވަނީ ތަފާތު އުކުޅުތައް ބޭނުންކޮށްފައެވެ.
އެފްބީއައި އަށް މި ކުށްވެރިޔާ ހޯދުމުގައި އެންމެ ބޮޑު އެހީތެރިކަމެއް ލިބިފައިވަނީ، އިންޓަނެޓުގެ ޒަރީއާއިން އޭނާ ހޯދަން މަސައްކަތްކުރި އާންމު ފަރާތަކުން ދިން މުހިންމު މައުލޫމާތެއްގެ އެހީގައެވެ. މި މައުލޫމާތުގެ އަލީގައި ތަހުގީގީ އިދާރާތަކުން ފަށައިގަތް މަސައްކަތުން އޭނާ ހޯދައި، އެތައް އަހަރެއް ފަހުން އަލުން ގާނޫނުގެ ކުރިމައްޗަށް މިހާރު ވަނީ ގެނެސްފައެވެ.