އިނގިރޭސިވިލާތުގެ ޕްރައިމް މިނިސްޓަރުކަމުގެ މަގާމާ އަލަށް ހަވާލުވެވަޑައިގެންނެވި އެންޑްރޫ ބާނަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ތަހުނިޔާ ފޮނުއްވައިފިއެވެ. ރައީސް މުއިއްޒު ތަހުނިޔާ ފޮނުއްވީ އެންޑްރޫއަށް ފޮނުއްވި ހާއްސަ ސިޓީފުޅެއްގައެވެ.
ރައީސުލްޖުމްހޫރިއްޔާ ފޮނުއްވި ސިޓީފުޅުގައި، އިނގިރޭސިވިލާތުގެ އާ ޕްރައިމް މިނިސްޓަރަށް މަތިކުރެވުނު އާ މަސްއޫލިއްޔަތުތައް އަދާކުރެއްވުމުގައި ފުރިހަމަ ކާމިޔާބީއަށް ވަނީ އެދިވަޑައިގެންފައެވެ. އަދި ފާއިތުވި އަހަރުތަކުގައި ރާއްޖޭގެ އިޖުތިމާއީ އަދި އިގުތިސޯދީ ތަރައްގީގައި އިނގިރޭސިވިލާތުން ވެދީފައިވާ މުހިންމު އެހީތެރިކަމާއި ހިއްސާ ފާހަގަކުރައްވައި، ރައީސް ވަނީ އެ ގައުމަށް ޝުކުރު އަދާކުރައްވާފައެވެ.
މީގެ އިތުރުން ދެ ގައުމުގެ ބަދަހި ގުޅުން އިތުރަށް ހަރުދަނާކުރެއްވުމަށްޓަކައި ޕްރައިމް މިނިސްޓަރު އެންޑްރޫ ބާނަމާއެކު ގާތުން މަސައްކަތްކުރެއްވުމުގެ ޝައުގުވެރިކަން ރައީސް މުއިއްޒު ފާޅުކުރެއްވިއެވެ. އަދި ދެ ގައުމުގެ ރައްޔިތުންނަށް މަންފާ ލިބޭނެ ދާއިރާތަކުން ގުޅިގެން މަސައްކަތްކުރުމަށްޓަކައި ކުރިއަށް އޮތް ތަނުގައި ޕްރައިމް މިނިސްޓަރާ ބައްދަލުކުރެއްވުމަށް އުންމީދުކުރައްވާ ކަމަށްވެސް ރައީސްގެ ސިޓީފުޅުގައި ވިދާޅުވިއެވެ.