އިންޑިއާގެ ތަމިލްނާޑޫ ސްޓޭޓްގެ ފުޑް ސޭފްޓީ ޑިޕާޓްމަންޓުން، ކެމިކަލް އަދި އާޓިފިޝަލް ކުލަ ގިނައިން ބޭނުންކޮށްގެން ތައްޔާރުކޮށްފައިވާ "ޕާޕަޑް" (އައްޕަލަމް) ވިއްކުމާއި އުފެއްދުން މަނާކޮށްފިއެވެ. ކާބޯތަކެތީގެ ރައްކާތެރިކަން ކަށަވަރުކުރާ އިދާރާއިން މި ނިންމުން ނިންމާފައިވަނީ މިފަދަ ކާބޯތަކެތީގެ ސަބަބުން އާންމުންގެ، ހާއްސަކޮށް ކުޑަކުދިންގެ ސިއްހަތަށް ބޮޑެތި ނުރައްކާތަކެއް ކުރިމަތިވަމުންދާތީއެވެ.
ޕާޕަޑް އަކީ ތަމިލްނާޑޫގެ ކޭންބުއިމުގެ ސަގާފަތުގައި ވަރަށް މުހިންމު ބައެކެވެ. ގޭގޭގައާއި ރެސްޓޯރަންޓްތަކުގައި ކެއުމާއެކު އާންމުކޮށް ޕާޕަޑް ބޭނުންކުރާއިރު، ފަހަކަށް އައިސް ތަފާތު ކުލަކުލައިގައާއި ތަފާތު ބައްޓަންތަކަށް ހަދާފައިވާ ޕާޕަޑްތައް ކުޑަކުދިންގެ މެދުގައި ވަރަށް މަގުބޫލުވެފައިވެއެވެ. ނަމަވެސް، އޮފިޝަލުން ވިދާޅުވާ ގޮތުގައި މި ތަކެތި އުފެއްދުމުގައި ގާނޫނުން ހުއްދަކުރާ މިންވަރަށްވުރެ ގިނައިން ކެމިކަލް ކުލަ ބޭނުންކުރެއެވެ.
ސިއްހީ އިދާރާތަކުން ހާމަކުރި ގޮތުގައި، މިފަދަ އާޓިފިޝަލް ކުލަތައް ގިނައިން ބޭނުންކުރުމުގެ ސަބަބުން ބަނޑުގެ މައްސަލަތަކާއި، އެލާޖީ އަދި ކިޑްނީގެ ބަލިތައް ކުރިމަތިވުމުގެ ފުރުސަތު ބޮޑެވެ. އަދި ގުޅުންހުރި ކެމިކަލްތައް އެކުލެވޭ ކާބޯތަކެތި ގަވާއިދުން ބޭނުންކުރުމަކީ ކެންސަރު ފަދަ ނުރައްކާތެރި ބަލިތަކަށް މަގުފަހިވާ ކަމެއްކަމަށްވެސް ފުޑް ސޭފްޓީ ޑިޕާޓްމަންޓުން މައުލޫމާތު ދެއެވެ.