އަލްޒައިމާސް ބަލީގެ ސަބަބުން ސިކުނޑިއަށް އަންނަ ބަދަލުތަކުގެ ތެރެއިން، ޑިމެންޝިއާ ނުވަތަ ހަނދާންނެތޭ ބައްޔަށް މަގުފަހިވެގެންދާ "ނާޒުކު މަރުހަލާ" ސައިންސްވެރިން ހޯދައިފިއެވެ. ބެލްޖިއަމްގެ "ވިލާމްސް އިންސްޓިޓިއުޓް ފޯ ބަޔޯޓެކްނޮލޮޖީ" ގެ ސައިންސްވެރިން ކުރި މި ދިރާސާއިން އެނގުނު ގޮތުގައި، ސިކުނޑީގެ ސެލްތަކަށް ބަދަލު އަންނަން ފެށިނަމަވެސް ބައެއް މީހުންނަށް ބަލީގެ އަލާމާތްތައް ފެންނަނީ އަދި އަނެއްބައި މީހުންނަށް ނުފެންނަނީ ސިކުނޑީގެ ދިފާއީ ނިޒާމުގެ މަސައްކަތް ހުންނަ ގޮތުންނެވެ.
މި ހޯދުމުގެ އެންމެ މުހިންމު ބަޔަކީ ސިކުނޑީގައި ހުންނަ ދިފާއީ ސެލްތައް ނުވަތަ "މައިކްރޯގްލިއާ" އިން، އަލްޒައިމާސް އުފެދެން މެދުވެރިވާ "އެމިލޮއިޑް ޕްލާކްސް" އާއި "ޓޯ" ޕްރޮޓީންތަކަށް އިޖާބަދޭ ގޮތެވެ. ސިކުނޑީގައި މި ޕްރޮޓީންތައް ޖަމާވާން ފެށުމުން، މައިކްރޯގްލިއާ ސެލްތަކުން އެ ތަކެތި ސާފުކޮށް ސިކުނޑި ރައްކާތެރިކުރުމަށް މަސައްކަތްކުރެއެވެ. ނަމަވެސް ބަލީގެ ވަކި މަރުހަލާއެއްގައި މި ދިފާއީ ނިޒާމު ބަލިކަށިވެ، ނުވަތަ މާބޮޑަށް އިޖާބަދީ ސިކުނޑީގެ ނާރުތަކަށް ގެއްލުންދޭން ފަށައެވެ.
ސައިންސްވެރިން ފާހަގަކުރާ ގޮތުގައި، މި "ޓިޕިންގ ޕޮއިންޓް" އަކީ ބަލިމީހާގެ ހަނދާނާއި ވިސްނުން ސަލާމަތުން ހުންނާނެތޯ ނުވަތަ ޑިމެންޝިއާއަށް ބަދަލުވެގެންދާނެތޯ ނިންމާ މުހިންމު އިމެވެ. ސިކުނޑީގައި ބަލީގެ އަލާމާތްތައް ހުރިނަމަވެސް، ދިފާއީ ސެލްތަކުން ރަނގަޅު މިންވަރަކަށް ރައްކާތެރިކަން ފޯރުކޮށްދޭ ނަމަ، އެ މީހެއްގެ ވިސްނުމުގެ ގާބިލުކަން ދިގު މުއްދަތަކަށް ދެމެހެއްޓެއެވެ.
މި އާ ހޯދުމާއެކު، އަލްޒައިމާސް ބައްޔަށް ފަރުވާ ކުރުމަށް އާ ދޮރުތަކެއް ހުޅުވިގެންދާނެއެވެ. ސައިންސްވެރިން އުއްމީދުކުރަނީ ސިކުނޑީގެ މައިކްރޯގްލިއާ ސެލްތަކުގެ މަސައްކަތް ވަރުގަދަކޮށް، މި ނާޒުކު މަރުހަލާގައި ސިކުނޑިއަށް ލިބޭ ގެއްލުންތައް ހުއްޓުވޭނެ އާ ބޭސްތަކެއް އުފެއްދުމަށެވެ. މީގެ ސަބަބުން ބަލީގެ ކުރީކޮޅު ފަރުވާދީ، އިންސާނާގެ ސިކުނޑީގެ ސިއްހަތާއި ހަނދާން ދެމެހެއްޓުމަށް ބޮޑު އެހީއަކަށްވެގެންދާނެއެވެ.
ހަވާލާ: ސައިންސް ޑެއިލީ 2026.