މާތް ﷲ އިންސާނާއަށް ދެއްވާފައިވާ ނިޢުމަތްތަކަކީ އަދަދުނުކުރެވޭހާ ގިނަގުނަ ނިޢުމަތްތަކެކެވެ. ޞިއްޙަތާއި، ވަޤުތާއި، މުދަލާއި، ޒުވާންކަމާއި، ލޮލާއި ކަންފަތްފަދަ ޙިއްސީ ނިޢުމަތްތަކަކީ އިލާހީ އިނާމުތަކެކެވެ. މި ދުނިޔެއަކީ އިމްތިޙާނުގެ ގޮވައްޗެއް ކަމުގައިވީހިނދު، މި ހުރިހާ ނިޢުމަތްތަކަކީ އިންސާނާއަށް ޙަވާލުކުރެވިފައިވާ އަމާނާތެކެވެ. އިމްތިޙާނުގެ މައިގަނޑު މަޤްޞަދަކީ އެ ނިޢުމަތްތަކުގެ ބޭނުން ހެޔޮގޮތުގައި ހިފައި، ހެޔޮޢަމަލު ކުރުމުގައި ދެމިތިބޭތޯ ބެލުމެވެ.
ނަމަވެސް، ގިނަ އިންސާނުންނަށް ދުނިޔޭގެ އަރާމާއި ލައްޒަތުގެ ތެރޭގައި ނިޢުމަތްތައް ދެއްވި ފަރާތް މަތިން ހަނދާންނައްތާލެވެއެވެ. ވަޤުތު ބޭކާރުކުރުމާއި، މުދާ ފާފަތަކަށް ޚަރަދުކުރުމާއި، ޞިއްޙަތާއި ބާރުގެ ބޭނުންކޮށްގެން އަނެކުންނަށް އަނިޔާވެރިވުމަކީ މިއަދު އާންމުވެފައިވާ ކަމެކެވެ. ދުނިޔޭގެ ވަގުތީ އުފަލަށްޓަކައި އިލާހީ ނިޢުމަތްތައް ނުބައިގޮތުގައި ބޭނުންކުރަމުންދާއިރު، އޭގެ ހިސާބު ބެލެވޭނެ ދުވަހެއް އަންނާނެކަން ހަނދާންނައްތާލެވެއެވެ.
ޤިޔާމަތްދުވަހަކީ ކޮންމެ އިންސާނަކުވެސް އޭނާއަށް ދެއްވި ނިޢުމަތްތަކާމެދު ސުވާލުކުރެވޭނެ ދުވަހެކެވެ. މާތް ﷲ ކީރިތި ޤުރުއާނުގެ ސޫރަތުއް ތަކާޘުރުގެ 8 ވަނަ އާޔަތުގައި ވަޙީކުރައްވާފައިވެއެވެ: ﴿ޘُمَّ لَتُسْأَلُنَّ يَوْمَئِذٍ عَنِ النَّعِيمِ﴾ (މާނައީ: "ދެން އެދުވަހުން (ތިޔަބައިމީހުންނަށް ދެއްވި) ނިޢުމަތްތަކާމެދު، ތިޔަބައިމީހުންނާ ސުވާލުކުރައްވާނެކަން ކަށަވަރެވެ.") މިއާޔަތުން އެނގޭގޮތުގައި، ކުޑަވިޔަސް އަދި ބޮޑުވިޔަސް، ދެވުނު ކޮންމެ ނިޢުމަތަކާމެދު ސުވާލުކުރެވި، އޭގެ ބޭނުން ހިފިގޮތުގެ ޖަވާބުދާރީވާން ޖެހޭނެއެވެ.
މަޝްހޫރު ދީނީ ޢިލްމުވެރިޔާ މުފްތީ މެންކް އިރުޝާދު ދެއްވާފައިވާ ގޮތުގައި، ދުނިޔޭގައި އަޅުގަނޑުމެންނަށް ލިބިފައިވާ ކޮންމެ ނިޢުމަތަކީ ޤިޔާމަތްދުވަހު އަޅުގަނޑުމެންގެ ފައިދާއަށް ނުވަތަ އަޅުގަނޑުމެންނާ ދެކޮޅަށް ހެކިދޭނެ އެއްޗެކެވެ. މުފްތީ މެންކް ފާހަގަކުރައްވާ ގޮތުގައި، ދުނިޔޭގައި ނިޢުމަތްތައް ބޭކާރުކޮށް، މާތް ﷲ އަށް ނުކިޔަމަންތެރިވުމުގައި ވަޤުތު ދުއްވާލައިފިނަމަ، އާޚިރަތްދުވަހު ހިތާމައިގެ ކަރުނައެޅުމަކުން އެއްވެސް ފައިދާއެއް ނުކުރާނެއެވެ. އެދުވަހުން އޮންނާނީ ހަމައެކަނި ހިތާމައާއި ރޯންޖެހުމެވެ.
ވީމާ، ޤިޔާމަތްދުވަހުގެ ހިތާމައާއި ކަރުނައިން ސަލާމަތްވުމަށްޓަކައި، މިއަދު އަޅުގަނޑުމެންނަށް ދެއްވާފައިވާ ނިޢުމަތްތަކުގެ އަގުވަޒަންކުރަންޖެހެއެވެ. އިލާހީ ނިޢުމަތްތަކަށް ޝުކުރުވެރިވުމަކީ ހަމައެކަނި ދުލުން ހަމްދު ކުރުމެއް ނޫނެވެ. އޭގެ އިތުރުން އެ ނިޢުމަތްތަކުގެ ބޭނުން މާތް ﷲ ރުއްސަވާ ގޮތުގައި ހިފުމެވެ. ފުރާނަ ހުރިހާ ހިނދަކު ތައުބާވެ، ހެޔޮކަންކަމުގައި މަޝްޣޫލުވެ، ނިޢުމަތްތަކުގެ ސަބަބުން ސުވަރުގެ ހާސިލުކުރާ ބަޔަކު ކަމުގައި ވަމާހިނގާށެވެ.
ހަވާލާ: މުފްތީ މެންކުގެ ދަރުހަކުން 2026.